Keler jyldan bastap jumyrtqa baǵasy 70 teńgege deıin ósýi múmkin dep habarlaıdy "Adyrna" ulttyq portaly "31 arnaǵa" silteme jasap.
Óıtkeni keler jyldan bastap Úkimet jumyrtqanyń baǵasyn erkin aınalymǵa jiberedi. Sondaı-aq, osy ýaqytqa deıin memleketten jumyrtqa óndirisine berilip kelgen sýbsıdııa tolyǵymen toqtatylady.
Soltústik Qazaqstan oblysynda sýbsıdııasyz "ómir súre almaıtynyn" málimdegen qus fabrıkalarynyń qojaıyndary endi baǵany eki esege deıin kóterýge májbúr bolatynyn aıtyp otyr.
Soltústiktegi 35 qus fabrıkasynyń tek beseýi ǵana jumyrtqa óndirýmen aınalysady. Kásipkerler qus ósirip, jumyrtqa shyǵarýdyń shyǵyny kóp bolatynyn aıtady. Máselen, bıyldyń ózinde jem-azyq eki esege qymbattap, janarmaı baǵasy 1,5 esege kóterilgen.
"Qazir jumyrtqanyń bir danasynyń baǵasy 35 teńgeden bastalady. Al sýbsıdııany alyp tastasa, ony kem degende 50 teńgeden satamyz", – deıdi qus fabrıkasy dırektorynyń orynbasary Aleksandr Chesnokov.
Buǵan deıin memleket qus fabrıkalaryna bir dana jumyrtqaǵa úsh teńge sýbsıdııa tólese, byltyrdan beri ony 2 esege qysqartyp tastaǵan. 2022 jyldan bastap jumyrtqa óndirisi úshin sýbsıdııa múlde tólenbeıdi. Sebebi, Qazaqstanda jumyrtqa tutyný boıynsha suranystan usynys kólemi artyp otyr. Al sýbsıdııa endi Qazaqstan ózin ózi tolyq qamtamasyz ete almaı otyrǵan taýarlarǵa ǵana tólenbek.
"Aýyl sharýashylyǵy mınıstrliginiń erejesine ózgeris engizilmese, endigi jyldan bastap jumyrtqaǵa sýbsıdııa tólemeımiz. Jumyrtqa baǵasyn erkin aınalymǵa jiberemiz. Budan bylaı baǵany naryq ózi retteýi tıis", – dedi SQO aýyl sharýashylyǵy basqarmasynyń bólim basshysy Jasulan Ýálıbekov.
"Adyrna" ulttyq portaly.
