Jańa oqý jylynda Aqtóbe oblysynda 418 mektepte 18 906 muǵalim eńbek etip, 167 myń oqýshy bilim alýda. Ustazdardyń 762-si — jas maman. Bıyl oblys boıynsha 8 205 oqýshy mektep túlegi atandy. Al jańa oqý jylynda birinshi synypqa 18 784 búldirshin qabyldandy.
Ustazdar mereıi
Senbi kúni aqtóbelikter halyqaralyq Ustazdar kúnin atap ótti. Merekege oraı "Óner" ortalyǵynda "Ustaz. Ulylyq. Ulaǵat" atty saltanatty shara uıymdastyryldy.
Sharaǵa qatysqan oblys ákiminiń orynbasary Bulbul Eleýsinova bilim salasynyń qyzmetkerlerin óńir basshysy Ońdasyn Orazalınniń atynan quttyqtap, olardyń jas urpaqty tárbıeleýge qosqan úlesterin, úlken jaýapkershilikti jáne qurmetke laıyqty eńbekterin aıshyqtap aıtyp ótti.
Oblys ákiminiń orynbasary Bulbul Eleýsizova bilim salasyndaǵy jetistikteri úshin 3 pedagogke "Y.Altynsarın", 1 pedagogke "Qazaqstan Respýblıkasynyń bilim berý isiniń qurmetti qyzmetkeri", ardager 2 ustazǵa "Eńbek ardageri" tósbelgilerin taqsa, oblystyń 22 ustazyna aımaq basshysynyń Alǵys hattary men arnaıy sertıfıkatyn tabystady. Sonymen qatar 3 muǵalimdi "Aqtóbe oblysynyń qurmetti ustazy" jáne 5 muǵalimdi "Aqtóbe oblysynyń úzdik pedagogi" ataqtarymen marapattady.
Eń jas "Úzdik pedagog"
Aqtóbe qalasyndaǵy "Nur Aqtóbe" yqsham aýdanyndaǵy №60 jalpy bilim beretin orta mekteptiń muǵalimi Áben Talǵat 29 qyrkúıek kúni Qostanaı qalasynda ótken Qazaqstan Respýblıkasynyń úzdik pedagogterin marapattaý rásiminde QR Bilim jáne ǵylym mınıstri Ashat Aımaǵanbetovtiń qolynan «Úzdik pedagog — 2021» ataǵyn jáne 2 917 000 teńge kólemindegi sertıfıkat aldy.
Informatıka pániniń muǵalimi ári dırektordyń oqý isi jónindegi orynbasary Áben Talǵat S.Báıishev atyndaǵy Aqtóbe ýnıversıteti jáne Q.Jubanov atyndaǵy Aqtóbe memlekettik ýnıversıtetinde oqyp, eki joǵary bilim alǵan. Jas maman «Bolashaq» kolledjinde, №23 orta mektepte jumys istegen.
2014-2016 jyldary «Aqparattyq júıeler» mamandyǵy boıynsha magıstratýrada oqyp, tehnıka ǵylymdarynyń magıstri atandy. 2018 jyly №60 orta mektebine ınformatıka páni muǵalimi bolyp jumysqa ornalasty. Jalyndy jas ujymdaǵy áriptesterimen etene aralasyp, kóptegen isterge uıytqy bolyp, ózin jaqsy qyrynan kórsete bildi. Jas maman óz shyǵarmashylyǵyn damytyp, elimizde qolǵa alynǵan «Oqýǵa qushtar mektep — oqýǵa qushtar ult» jobasyn júzege asyrýda beınetanystyrylym da túsirip úlgerdi. Onyń bul jumysyn kópshilik jyly qabyldady.
Árdaıym ujymdastary men shákirtterine úlgi bolyp júrgen jas ta bolsa, úzdik atanǵan maman alda da talaı belesterdi baǵyndyrady dep senemiz.
Raıldiń jetistigi
Qazir bilim ordalarynda er muǵalimderdiń sany az. Shákirtke bilimmen qatar jan-jaqty tárbıe berip júrgen er azamattardyń jóni qashan da bólek. Sondaı ustazdardyń biri — Mártók aýdany Rodnıkovka orta mektebiniń muǵalimi Raıl Abılov.
"Ómir jolymda sanaly urpaq tárbıelep, sapaly, jan-jaqty, synı oılaı alatyn, zaman talabyna saı, óz Otanynyń bolashaǵy úshin kirpish bop qalana biletin azamat pen azamatshalardy bilim berýdegi ozyq tájirıbelermen oqytyp, bilim berý — meniń maqsatym"- deıdi Raıl Abılov.
Raıl Abılov óz sabaqtarynda zamanaýı jańa tehnologııalardy qoldanyp dáris berip keledi. Qazirgi zamanaýı tehnologııalar 3 D modeldeý, robottardy túrli deńgeıde programmalaýdy shákirtterine úırete otyryp jumys jasaıdy. Zaman talabyna saı úsh tilde sabaq júrgizedi.
Raıl — oblystyq ınformatıka muǵalimderi arasynda ótken pándik olımpıadalarynyń jeńimpazy (1-oryn), oblys boıynsha «Úzdik ınformatık muǵalim» nomınaııasynyń ıegeri. "Bilim berý úrdisinde robototehnıka, baǵdarlamalaý" atty 3D tehnologııasyn qoldanýdy damytýdaǵy oblystyq jobalar baıqaýynda yǵarmashylyǵy men kásibı jetistigin joǵary deńgeıde kórsetip, jeńimpaz atandy.(1-dárejeli dıplom). Oblystyq «Ǵalamtorda baǵdarlamalaý» atty ádistemelik jınaqtyń avtory. Oqýshylary aýdandyq, oblystyq respýblıkalyq baıqaýlardyń júldegerleri.
Danagúl BAIMUQASh,
"Adyrna" ulttyq portaly.
