Ermekbaevtyń otstavkasy qoǵamnyń tynyshtyǵy úshin qajet boldy

2141
Adyrna.kz Telegram

Eshteńeniń baıybyna barmaı, anyǵyna jetpeı, áleýmettik jelidegi sansyz aıtaq sózderge erip, azamattardy qaralaý beleń alyp keledi. Feık aqparattyń taralý jyldamdyǵy aqıqaty basym, ýaqyttyń sheshimin qajet etetin shynaıy málimetterdi basyp ketip jatyr. Mine, eks-mınıstr Nurlan Ermekbaevtyń Jambyldaǵy jarylystan keıingi alǵashqy portreti osyndaı keleńsizdikterden qalyptasty. Ras, 17 azamattan beıbit kúnde aıyrylý ońaı emes, biraq onyń sebep saldary tek bir kiside emes ekenin birazymyz bilemiz.

Jarylys bolǵan sátten-aq otstavkaǵa ketýin talap etken qoǵamnyń usynysy jerde qalmady, mınıstr moınymen kóterip, jaǵdaı turaqtalǵan soń qyzmetimen qosh aıtysýǵa daıyn ekenin málimdedi. Birer kúnnen soń Prezıdent eks-mınıstrdiń ótinishin qabyl alyp, ony bul qyzmetten bosatty.

Qoǵam qanaǵattanǵanmen, sarapshylar men saıasatkerler Ermekbaevtyń bul qadamyna tańdana qarady. Sebebi buǵan deıin álemniń ózge elderinde oq-dári qoımalaryndaǵy jarylystan keıin eshbir mınıstr mansabyn toqtatpaǵan. Tipti telegramdaǵy 300 myńnan asa jazylýshysy bar NEZYGAR kanaly da Ermekbaevtyń áreketine baǵa berip, buryn sońdy jarylysqa bola bir vedomstvonyń mınıstri otstavkige ketkenin estimegenin jazdy.

«Ras, ózge elde, máselen, Ýkraına, Chehııa, Reseıde jarylys boldy. Biraq mınıstr emes, oq-dáriniń saqtalýyna jaýap beretin azamattardan suraý alyndy. Jáne de mundaı keleńsiz oqıǵa ishki tártip boıynsha tergelip, jaýaptylar jazasyn alatyn. Al Qazaqstanda bul basqalaı órbidi»,– dep jazyldy telegram kanalda.

Akkaýntyń ókilderi Nurlan Ermekbaevtyń bul áreketin alysty kózdeý dep tujyrymdady. Qıyn-qystaý kezeńde jaýapkershilikten qashpaıtynyn kórsetý arqyly bıliktiń seniminen shyǵa alatynynsezdirip, tolyqtaı moınymen kótere alatynyn dáleldedi deıdi.

Al belgili qoǵam qaıratkeri Ermuhamed Ertisbaev You Tube-tegi arnasynda Jambyldaǵy oqıǵaǵa baǵa berdi. Ol alyp-qashpa áńgimelerdi emes, qoljetimdi qujattardy negizge ala otyryp, áskerdegi maman-ofıerlermen pikirlesip, tujyrymyn aıtty. Oq-dáriler qoımasyndaǵy jarylys tabıǵı qubylys bolmasa da, kezdeısoq nárse emes, onyń áskerde oryn alý yqtımaldyǵy joǵary ekenin jetkizdi

Álemdegi kez kelgen armııa úshin jarylys kezdeısoqtyq emes, ol ekonomıkalyq deńgeıine de, geosaıası ornalasýyna da, qandaı da bir artyqshylyq pen kemshilikke de baılanysty emes. Nege deseńiz, oq-dáriler bolsyn, jalpy Qarýly Kúshterdiń ózi bolsyn, paradoksqa uqsaıtynyna qaramastan, joǵary qaýiptiń kózi bolyp tabylady. Qalaı aıtsaq ta, eshbir memlekettik organda qorǵanys vedomstvosynda sııaqty sonsha kóp qaýipti, joıqyn qyrǵynǵa ushyratatyn qarý-jaraq, tehnıka men oq-dári joq. Qazaqstan armııasynyń taǵy bir ereksheligi – qarý-jaraq pen oq-dárilerdiń basym bóligi keńes dáýirinen qalǵan. Olardyń kepildi paıdalaný merzimi baıaǵyda ótip ketken, – dedi qoǵam belsendisi.

Kózi ashyq oqyrman Qazaqstan Qarýly Kúshterindegi 30 jyl boıy jınaqtalǵan problemany otstavka sheshpeıtinin jaqsy túsinedi.Ertisbaev ta muny tarqatyp aıtty.

Armııa da bizdiń jalpy memlekettik júıe sııaqty óte «ıkemsiz», sondyqtan jyldar boıy qalyptasqandy túzetý úshin Ermekbaev basshylyq etken 3 jyl árıne az. Elimizdiń tarıhynda qorǵanys salasyn armııa generaldary da, saıası basqarýshylar da basqarǵan bolatyn. Olardyń árqaısysynyń kezinde de oq-dáriler qoımalarynda jarylys bolyp, áskerı qyzmetshiler men azamattyq turǵyndar qaza tapqan. Ol tótenshe jaǵdaılar birli-jarym da boldy jáne serııaly túrde de boldy, biraq eshbir mınıstr ornynan ketpedi, – dedi qoǵam belsendisi.

Almas JANTAIULY

Pikirler