Mańǵystaý oblysynda 700 adam Plus Capital qarjylyq uıymyna múlki men qomaqty qarajatyn salyp, aldanyp qalǵan dep habarlaıdy "Adyrna" ulttyq portaly 31-arnaǵa silteme jasap.
Atap aıtsaq, mańǵystaýlyq 700 turǵynnyń barlyǵy qujatyn jalǵyz notarıýsqa rásimdegen. Al jarnamasy Aqtaý kóshelerinde ilinip, áleýmettik jelide keńinen taralǵan qarjy uıymy Artýr Temirǵalıevtiń atyna tirkelgen. Alaıda qujattarǵa onyń esepshileri men ózge qyzmetkerleri qol qoıǵan.
Qazir Artýr Temirǵalıevtiń qaıda ekeni belgisiz. Ol týraly 1,5 jyldan beri habar joq. Alaıaq salymshylarǵa qarajatyn 2 ese etip qaıtarýǵa ýáde etken eken. Salymshylar qujattar notarıaldy túrde rásimdelgendikten sengen, alaıda notarıýs Sofııa Kýshnırenko jalǵan qujat rásimdep otyrypty.
"Halyq bul notarıýske sendi, sebebi ol Ádilet mınıstrliginde tirkelgen. BIN nomeri bar", – deıdi salymshy Saılaýgúl Ásemova.
Mańǵystaý oblystyq Ádilet departamenti basshysynyń orynbasary Áýes Kóshkinbaı jeke notarıýstardyń kúndelikti is-áreketin ENIS bazasynan qarap otyrýǵa ózderinde ruqsat joq ekenin alǵa tartady.
"Eger olardyń jasaǵan is-áreketin tergeý júrgizý qajet bolsa, onda biz azamattardan túsken aryz-shaǵym esebinde qaraımyz", — deıdi ol.
Qarjylyq uıymnyń arbaýyna túsken tek salymshylar emes. Artýr Temirǵalıevten jyljymaıtyn múlikti satyp alǵandar da bar. Osy iske qatysty tergeý byltyr aqpan aıynda júrgizilip, sot bıyl shildede bastaldy.
"Adyrna" ulttyq portaly.
