Aqtaý qalasynyń 43 jastaǵy turǵyny Qýandyq Ómirov dúısenbi-juma kúnderi tańerteń jetiden segizge deıin jáne keshki segizden túnge deıin qala turǵyndaryn tegin jetkizip salady dep habarlaıdy "Adyrna" ulttyq portaly "Habar24" silteme jasap.
Taksı júrgizýshisi qala ishin kóligimen aralap, jolaýshylardy dittegen jerine aqysyz aparady. Meıirimdi jannyń isine bireýler tańǵalsa, endi biri rızashylyqtaryn bildirip jatady.
Turǵyndar "Qala boıynsha tegin TAXI" dep taqtaısha jabystyrǵan kólik júrgizýshisin birden tanıdy. Aqsha tólemeı jetkender áleýmettik jelige jarysa jazýda.
Al Qýandyq Ómirovtiń maqsaty — pandemııa jaǵdaıynda turǵyndardyń kóńilin kóterý, saýapty is jasaý.
"Bul ıdeıany oılap júrgenime úsh aı boldy. Biraq halyq qalaı qaraıdy dep oıladym. Ashqanyma bir juma boldy, taksı tegin dep aıaldamaǵa kelip aıǵaılaımyn, elder qýana-qýana minedi. Bireýler túsinbeıdi, vakına saldyrtasyńdar ma dep suraıdy. Qorqatyn da shyǵar, Mańǵystaýda tegin taksı tarıhta bolmaǵan deıdi", - deıdi Q.Ómirov.
Aqtaýlyq azamat avtoelektrık bolyp jumys isteıdi. Shaǵyn núktesinde 3 adamdy jumyspen qamtyp otyr.
Ol dúısenbi-juma kúnderi tańerteń 7-den 8-ge deıin, keshke 8-den tún jarymǵa deıin turǵyndardy tegin jetkizip salady. Al senbi, jeksenbide kúni boıy jolaýshylardy tasymaldaıdy.
"Adyrna" ulttyq portaly.
