Atyraý oblysy ákimi Mahambet Dosmuhambetov Inder kenti turǵyndaryna 80 páterlik bes qabatty turǵyn úıdiń kiltin el táýelsizdiginiń 30 jyldyq merekesi aıasynda tabys etti.
«Kóktem» móltek aýdanynyń 11 ýchastiginen salynǵan 80 páterlik bes qabatty úıden baspanaly bolǵan aýdan turǵyndary ata-ana qamqorlyǵynsyz qalǵan, kóp balaly, jalǵyzbasty analar sondaı-aq, múmkindigi shekteýli jandar sekildi áleýmettik áljýaz toptaǵy azamattar.
Páter kiltin alǵandardyń biri, kóp balaly ana Larısa Qaırosheva úı kezeginde alty jyldan beri turǵan.
«Biz bir úıde úsh kelin birge turyp kelgenbiz. Árqaısymyzdyń bala-shaǵamyz bar, úı tarlyq etip kelgen edi. Mine, kópten kútken qýanyshymyzǵa qol jetkizip turmyz. Oblys ákimine, osy úı salýǵa eńbegi sińgen ózge de azamattarǵa alǵysymdy aıtamyn. Halyqty qýantyp jatqan ıgi ister jalǵasyn taba bersin!»,-dedi ol.
Aımaq basshysy Mahambet Dosmuhambetov Inder aýdanynda Nurly jer baǵdarlamasymen kópqabatty 7 turǵyn úı salynýda ekenin, bul 432 otbasyǵa baspana bolatynyn aıtty. Solardyń alǵashqy 80 páteri tapsyryldy.
«Inder aýdany búgingi tańda joǵary qarqynmen damyp kele jatyr. Búgingi shara sonyń bir aıǵaǵy. Bul Sizder úsh el táýelsizdiginiń 30 jyldyq merekesi aıasynda erekshe tartý bolmaq. Odan bólek jyl sońyna deıin taǵy 4 úıdi paıdalanýǵa berý josparlanýda. Sol arqyly 192 otbasy qonys toıyn toılaıdy»,-dedi oblys ákimi.
Sondaı-aq, aımaq basshysy aldaǵy jyldary Kóktem móltek aýdanynyń 11 ýchastigi jańa serpinmen damytý josparlanyp otyrǵanyn atap ótti. Óńir basshysy munda bolashaqta kópqabatty úılermen qatar áleýmettik nysandar salý qarastyrylypty. Atap aıtqanda 900 oryndyq mektep, 250 oryndyq balabaqsha. 100 oryndyq emhana men 320 oryndyq dene shynyqtyrý-saýyqtyrý kesheni salynbaq.
«Inder aýdanyn kórkeıtý jumystary jalǵasyn tabady. Jalpy Prezıdentimizdiń tapsyrmasy boıynsha kóptegen ıgilikti is júzege asyrylýda. Árbir memlekettik baǵdarlama turǵyndarymyzdyń jaıly ómir súrýine baǵyttalǵan. Olardyń túpki maqsaty azamattarymyzdyń ál-aýqatyn arttyrý»,-dedi M.Dosmuhambetov.
Atalǵan sharadan soń oblys ákimi aýdandaǵy mańyzdy nysandardy aralap, aýdannyń birneshe qoǵam belsendilerimen kezdesti.
