Senbi jáne jeksenbi kúnderi «Habar» telearnasynan birneshe jobanyń jańa maýsymdaǵy tusaýkeserleri kútilýde.
Atap aıtqanda, 4 qyrkúıek saǵat 10:00-de «XXI ǵasyr kóshbasshysy» baǵdarlamasy; 4 qyrkúıek saǵat 11:00-de «Áke baqyty» baǵdarlamasy; 5 qyrkúıek saǵat 19:30-da «ECO MEKEN» realıtı-shoýy jáne kópten kútken jańalyq - «Kelinjan» telehıkaıasynyń úshinshi maýsymy 6 qyrkúıek saǵat 21:30-da kórermenge jol tartady.
«XXI ǵasyr kóshbasshysy» ıntellektýaldy-tanymdyq oıyny efırge qaıta oralady. Respýblıkalyq mektepterdegi daryndy jastardy biriktirip, qalyń kópshilikke tanystyratyn bilimdiler báıgesin «Habar» arnasynan osy senbi kúni tamashalaı alasyzdar.
«ECO MEKEN» - Qazaqstandaǵy alǵashqy ekologııalyq realıtı-shoý. Jobanyń maqsaty - ekologııalyq dúnıetanymdy keńinen nasıhattap, keleshegi zor qatysýshyny anyqtaý. Joba jeńimpazy 10 mıllıon teńge kóleminde aqshalaı syılyqqa ıe bolady.
«Áke baqyty» baǵdarlamasy – januıadaǵy áke men bala arasyndaǵy baılanysty aıshyqtaıtyn, asqar taý ákelerdiń rólin asqaqtatatyn joba. Halyqqa tanymal juldyzdardyń ákelik rólindegi obrazyn kórý kórermen úshin qyzyq bolary anyq.
Qalyń kórermenniń súıikti jobasyna arnalǵan «Kelinjan-3» telehıkaıasy qazaqy turmysty, ene men kelin arasyndaǵy qarym-qatynasty ádemi ázilmen, oryndy qaljyńmen jetkizedi. Jańa keıipkerlerimen tolyqqan teletýyndy burynnan da qyzyq bolatyny kúmánsiz.
