QANAT ÁBILQAIYR: Tilge alańdaǵan jas qalamgerlerdi arnaıy baǵdarlamamen soltústikke kóshirý kerek

1792

Keshe QR Prezıdenti Qasym-Jomart Toqaevqa bir top jas qalamger ashyq hat jazdy. Olardyń memlekettik til - qazaq tiline degen janashyrlyǵyna rıza bolmasqa shara joq! Biraq ta, táýelsizdik alǵaly mundaı júzdegen hat jazylǵanyn bilemiz. Onyń birinen de nátıje shyqpaǵany taǵy bar. Nege bulaı boldy?

Sebebi, aıtýmen, aıǵaılaýmen, hat jazýmen esh másele sheshilmeıdi. Mundaı ashyq hattarǵa bola tildiń máselesi sheshilse, otyz jyl boıy bir orynda omalyp otyrmas edik. Qurydy degende Shahanov atamyzdyń shekesine shodyraıyp bir múıiz shyǵar edi. Qarańyz, ol da joq...

Iaǵnı, Prezıdentke hám hat jazǵysh jastarǵa "ne isteý kerek?" degen suraq týady. Menińshe, tildiń joǵyn joqtaǵan tulǵalardy hám qoǵam belsendilerin orystanǵan ólkelerge (negizinen qalalar men aýdan ortalyqtaryna) qonys aýdarýǵa memleket tarapynan qoldaý jasaý kerek.

Ol azamattar aýyzben aıtqanyn is júzinde júzege asyryp kórsin! Naqty memlekettik tildi úıretý kýrstaryna basshylyq etsin! Sol óńirlerdiń ishki saıasat jumystarymen aınalyssyn! Aýdandyq, oblystyq basylymdar arqyly til maıdanyna kirsin! Sol óńirlerden qazaq mektepterin, balabaqshalaryn ashý, ol mekemelerge jas mamandar tartý sekildi myń san jumystarmen shuǵyldansyn! Osy myń san iske álgi hatqa qol qoıǵan alpysqa jýyq hám onyń syrtyndaǵy myń qoldaýshy taptyrmas maman bolar edi.

Óstip, "jaý júrek myń balany" soltústik óńirlerge attandyrsaq (qajet bolsa biz de barýǵa daıynbyz), olar naqty bilim tájirıbelerin memlekettik tildiń damýyna baǵyttasa, tym quryǵanda seń qozǵalar edi.

Ótken ǵasyrda naqty kúrestiń jolyn alashordalyqtar kórsetip berdi. Olar kitap ta jazdy, aǵartýshy da boldy, saıasatpen de aınalysty... Prezıdent sol dańǵylǵa "janyn julyp jep turǵan" osy jastardy qaıta salyp jiberse, on jylda-aq onyń jemisin jep otyrar edik.

Kezinde "tyń ıgerý" degen syltaýmen qazaq jerine kelimsekter aǵyldy. Endi ol ólkelerge túpkilikti ıe bolyp qalý úshin naqty áreket jasaýymyz qajet.

Meniń osy oıymdy prezıdenttiń qulaǵyna sybyrlap kórińizshi, Berik aǵa! Ne der eken?!

Pikirler
Redakııa tańdaýy