Tılge alaŋdaǧan jas qalamgerlerdı arnaiy baǧdarlamamen soltüstıkke köşıru kerek

Keşe QR Prezidentı Qasym-Jomart Toqaevqa bır top jas qalamger aşyq hat jazdy. Olardyŋ memlekettık tıl - qazaq tılıne degen janaşyrlyǧyna riza bolmasqa şara joq! Bıraq ta, täuelsızdık alǧaly mūndai jüzdegen hat jazylǧanyn bılemız. Onyŋ bırınen de nätije şyqpaǧany taǧy bar. Nege būlai boldy? Sebebı, aitumen, aiǧailaumen, hat jazumen eş mäsele şeşılmeidı. Mūndai aşyq hattarǧa bola tıldıŋ mäselesı şeşılse, otyz jyl boiy bır orynda omalyp otyrmas edık. Qūrydy degende Şahanov atamyzdyŋ şekesıne şodyraiyp bır müiız şyǧar edı. Qaraŋyz, ol da joq... Iаǧni, Prezidentke häm hat jazǧyş jastarǧa "ne ısteu kerek?" degen sūraq tuady. Menıŋşe, tıldıŋ joǧyn joqtaǧan tūlǧalardy häm qoǧam belsendılerın orystanǧan ölkelerge (negızınen qalalar men audan ortalyqtaryna) qonys audaruǧa memleket tarapynan qoldau jasau kerek. Ol azamattar auyzben aitqanyn ıs jüzınde jüzege asyryp körsın! Naqty memlekettık tıldı üiretu kurstaryna basşylyq etsın! Sol öŋırlerdıŋ ışkı saiasat jūmystarymen ainalyssyn! Audandyq, oblystyq basylymdar arqyly tıl maidanyna kırsın! Sol öŋırlerden qazaq mektepterın, balabaqşalaryn aşu, ol mekemelerge jas mamandar tartu sekıldı myŋ san jūmystarmen şūǧyldansyn! Osy myŋ san ıske älgı hatqa qol qoiǧan alpysqa juyq häm onyŋ syrtyndaǧy myŋ qoldauşy taptyrmas maman bolar edı. Östıp, "jau jürek myŋ balany" soltüstık öŋırlerge attandyrsaq (qajet bolsa bız de baruǧa daiynbyz), olar naqty bılım täjıribelerın memlekettık tıldıŋ damuyna baǧyttasa, tym qūryǧanda seŋ qozǧalar edı. Ötken ǧasyrda naqty kürestıŋ jolyn alaşordalyqtar körsetıp berdı. Olar kıtap ta jazdy, aǧartuşy da boldy, saiasatpen de ainalysty... Prezident sol daŋǧylǧa "janyn jūlyp jep tūrǧan" osy jastardy qaita salyp jıberse, on jylda-aq onyŋ jemısın jep otyrar edık. Kezınde "tyŋ igeru" degen syltaumen qazaq jerıne kelımsekter aǧyldy. Endı ol ölkelerge tüpkılıktı ie bolyp qalu üşın naqty äreket jasauymyz qajet. Menıŋ osy oiymdy prezidenttıŋ qūlaǧyna sybyrlap körıŋızşı, Berık aǧa! Ne der eken?!