Din isteri jáne azamattyq qoǵam mınıstri Nurlan Ermekbaev elimizdegi ustanymy dástúrli ıslamǵa jat dinı aǵym ókilderi men dinı ahýal týraly aıtypty.
Bul týraly “Astana” telearnasy habarlaıdy.
“Mınıstrlik memlekettik din salasyndaǵy saıasattyń tujyrymdamasyn ázirledi. Bul tujyrymdama kóptegen sarapshylar men dintanýshylardyń oı-pikirlerin, usynystaryn eskerip, keń talqylaýdan ótti. Qazir tujyrymdama daıyn, jaqyn arada úkimettiń talqylaýynan ótip, bekitiletin bolady dep úmittenemiz”, – dedi mınıstr.
Bul oraıda mınıstr dástúrli emes dinı aǵymdardyń taralýynan týyndaıtyn máselelerge de toqtalyp ótti.
“Qazir biz destrýktıvti aǵym dep kez kelgen radıkaldy fanatızmge negizdelgen, Qazaqstanǵa jat dinı aǵymdardy aıtyp otyrmyz. Biraq olardyń ishinde qazirgi tańda eń ózekti – ol salafızm degen radıkaldy aǵym. Destrýktıvti dinı aǵym, mysal úshin salafızm bolsyn, olar qatelik dinı túsinikterdi bizdiń tarıhı dástúrlerimizden, mádenıetimizden, bizdiń halqymyzdyń kóp etnosty, konfessııalyq sıpatynan joǵary qoıady. Olar tek sharıǵatqa, baıaǵy ejelgi dinı talaptarǵa negizdelgen memlekettiń qurylysyn durys júıe dep esepteıdi. Mundaı shetin ıdeıalar san ǵasyrlyq tarıhymyzǵa, san ǵasyrlyq mádenıetimizge qaıshy keletini sózsiz.
Sheteldegi belgili bir sheıhtardan sıgnal kelse, ol kez kelgen ýaqytta qolǵa qarý alyp, óz jerlesterine, úkimetke, memleketke qarsy shyǵa alady.
Sondyqtan olarǵa senim degen joq” – deıdi Nurlan Ermekbaev.
Budan syrt ol shetelge dinı bilim alýǵa ketken jastarǵa qatysty pikirin bildirdi.
«Shetelde jekelegen dinı bilim berý oqý oryndaryna ketken, óz betterimen ketken jastardyń radıkaldy dinı aǵymnyń yqpalyna túsýi ábden múmkin. Shetelderdegi túrli dinı bilim berý ıeleri solar arqyly qoǵamdy basqarýdy qalaıdy. Sondyqtan bizdiń usynysymyz, jastar eger shetelge dinı bilim alýǵa barǵylary kelse, olar aldymen Qazaqstan musylmandary dinı basqarmasyndaǵylarmen aqyldasyp, joldama alyp, shetelge barsa bolar edi. Eger óz betterimen shetelge baryp bilim alsa, QMDB olardy jumysqa qabyldamaıdy» – dedi mınıstr bul rette.
