Jambyl oblysyndaǵy jarylystan aman qalǵan órt sóndirýshi oqıǵanyń qalaı bolǵanyn aıtyp berdi. Aýrýhanada em qabyldap jatqan Almaz Tursynovtyń sózinshe, áskerı qyzmetkerler oq-dárige toly qoımaǵa kelgen mamandardyń basshylaryna "qaýip joq" ekenin aıtqan kórinedi. Al, tótenshelikter osy sózge senip órtti sóndirýge ruqsat bergen.
Sol ýaqytta joıqyn jarylys tirkelipti. Al, órtsóndirýshilerdi qutqarýdyń ornyna áskerıler ol sátte oqıǵa ornynan bas saýǵalap qashyp ketken eken.
Qazir Almaz Tursynovpen birge qaýipti aımaqqa barǵan mamandardyń barlyǵy kóz jumǵan. Bir ólimnen aman qalǵan jigittiń jarylystan eki kózine zaqym kelip, qol-aıaǵy synǵan.
Bul týraly «Eýrazııa» birinshi arnasy habarlaıdy.
ALMAZ TURSYNOV, ZARDAP ShEKKEN ÓRT SÓNDIRÝShI:
"Sol jaqta júrgen úlken polkovnık kisiden suradym: "Jarylady ma?" dep. Sosyn ol aıtty "Óı, jarylmaıdy, erýnda ǵoı bul dep. Ózi biraq, otstýpat etip jatqanyn kórdim, baıqadym. Voennyı formada júrdi ol kisi sóıtti da ol kisi ketip qaldy. Biraq, biz óshirip jatqan kezde ýje bastalyp jatqan, shet shetke oqtar ushyp. Karaýl bastyǵy aıtty: "Jáı, jáı artqa bereıik, che to ne to mynaý", - dedi. Abaılaıyqshy jigitter, dep sezdi karaýl bastyǵy".
Buǵan deıin Jambyl oblysy Baızaq aýdanyndaǵy kúzetilmeıtin qoımalardyń birinen jarylmaǵan oq-dáriler tabyldy degen aqparat taraǵan edi. Biraq, keıinnen Qorǵanys mınıstrligi ol snarıadtardyń barlyǵy gılzasy alynǵan, metallǵa ótkizilgen qaýipsiz oq-dáriler ekenin málimdedi. Al, jarylys kezindegi órt sóndirýshilerdiń nusqasyna qatysty Nurlan Ermekbaev basqaratyn vedomstvo mardymdy jaýap bergen joq. Tek, áskerı bólimge jaýaptylar qoımadaǵy ınjenerlik snarıadtar jarylmaýy tıis edi dep qysqa qaıyrdy. Naqty sebebin arnaıy qurylǵan komıssııa anyqtaıtyn bolady.
RÝSLAN JYLQYBAEV, ÁSKERI BÓLIM KOMANDIRINIŃ ORYNBASARY:
"Órtengen qoımadaǵy ınjenerlik oq-dáriler tehnıkalyq sıpattamalaryna qaraı jarylmaýy tıis edi. Sondyqtan áskerı bólimniń órtsóndirý toby órtti oqshaýlaý týraly sheshim qabyldaǵan. Sonymen qatar, oqıǵa ornyna jol patrýldik qyzmetiniń órtsóndirý bólimderi jumyldyryldy. Jarylystardyń sebepterin quramynda bilikti sarapshylary bar komıssııa anyqtaýy kerek".
