Atyraý oblysynyń ákimi Mahambet Dosmuhambetov «Shevron» kompanııasynyń Evrazııa-Tynyq muhıty óńirindegi barlaý jáne óndirý jónindegi Prezıdenti Naıdjel Hırnmen kezdesti.
Kezdesý barysynda «Shevron» kompanııasynyń qatysýymen Atyraý oblysynda júzege asyrylyp jatqan jobalardyń barysy talqylandy.
Oblys ákimi Mahambet Dosmuhambetov atalǵan kompanııanyń iri ınvestor retinde óńirdegi, jalpy, el ekonomıkasyndaǵy rólin atap ótip, qalyptasqan tıimdi áriptestik jalǵasyn tabatynyna senim bildirdi. Sondaı-aq, negizgi akıoneri «Shevron» bolyp tabylatyn «Teńizshevroıl» JShS-i Atyraý halqy úshin qajetti áleýmettik-ınfraqurylymdyq jobalardy iske asyrýǵa belsendi atsalysyp júrgeni úshin alǵysyn aıtty.
Sonyń ishinde, koronavırýs pandemııasymen kúreste «Teńizshevroıl» kompanııasy úlken qoldaý kórsetti.
Óz kezeginde Naıdjel Hırn Atyraý óńirindegi jobalardyń «Shevron» kompanııasy úshin úlken mańyzy bar ekenin atap ótti. Sosyn Teńiz ken ornynda koronavırýstyń jappaı taralýyna jol bermeı, qatań sanıtarlyq talap ornatyp, epıdemııalogııalyq ahýaldy turaqty ustaýǵa oblys ákimdigi tarapynan jan-jaqty qoldaý jasalyp kele jatqanyn rızashylyqpen atap ótti. Jalpy, kompanııa basshylyǵy men jergilikti atqarýshy organdarmen arada qalyptasqan jaqsy qarym-qatynas óndiristik jáne áleýmettik máselelerdi tıimdi sheshýge oń yqpal etip, bul óńir halqynyń múddesine qyzmet etetinine de erekshe toqtaldy.
Aıta keteıik, Atyraý oblysy aýmaǵynda atalǵan kompanııanyń qatysýymen jumys jasap jatqan úsh joba bar: «Teńizshevroıl» JShS-i, «Kaspıı qubyr konsorıýmy-Q» AQ; «ShevronMunaıGaz» Ink. Polıetılen qubyrlary zaýyty.
