Atyraý oblysynyń ákimi bazardaǵy baǵa turaqtylyǵyn tekserdi

1041
Adyrna.kz Telegram

Búgin Atyraý oblysynyń ákimi Mahambet Dosmūhambetov aýyl sharýashylyǵy jármeńkesin aralap kórdi.

Et, sút, balyq ónimderi men kókónisterdiń baǵasyn kórip, turǵyndarmen tildesti. Aptanyń senbi-jeksenbi kúnderi qaladaǵy «Alaman» jáne «Elnas» bazarlarynda sanıtarlyq talaptar saqtala otyryp, turaqty túrde jármeńke uıymdastyrylyp keledi. Sharýalar orynǵa jalaqy tólemeıtindikten ónimderin deldaldarsyz tutynýshylarǵa tikeleı arzan baǵaǵa sata alady. Turǵyndar úshin de qoljetimdi baǵaǵa ónim alý dástúrge aınalyp keledi.

Atyraý qalasy kásipkerlik jáne aýyl sharýashylyǵy bólimi uıymdastyrǵan Atyraý móltek aýdany, «Alaman» bazaryndaǵy jármeńkege Atyraý qalasy, Mahambet, Isataı jáne Inder aýdandarynan barlyǵy 80-ge jýyq sharýa qojalyqtary men taýar óndirýshiler qatysqan. Olar óz ónimderi men syrttan jetkizilgen túrli ónimderin satty. Óńir basshysynyń tapsyrmasyna sáıkes, baǵaǵa qatysty monıtorıng jumystary turaqty túrde júrgizilip keledi. Turaqtandyrý jumystarynyń nátıjesinde kartoptyń kelisi qazir 170 teńgeden satylýda. Aldaǵy ýaqytta bul baǵa 110-120 teńgege deıin tómendeıdi dep boljanyp otyr. Óıtkeni, shilde aıynda jergilikti ónimder satylymǵa shyǵa bastaıdy. Sol kezde bastapqy baǵa qalpyna keledi.

Turǵyndar naryq baǵasynan tómen baǵamen qajetti taýarlaryn alýda. Máselen, Jańatalaptyń jetken jylyjaı qııarlarynyń kelisi 40 — 75 teńgeden satylýda. Pııaz 100-110 teńgeden, qyryqqabat 130 teńgeden, jumyrtqa C2-24, C1-26, s3-12 teńgeden, sıyr etiniń kelisi 1700-1800 teńgeden, sazan 650 teńgeden, al sábiz 400-450 teńgeden saýdalandy. Óz kezeginde oblys basshysy baǵanyń turaqtylyǵyn basty nazarda ustaýdy tapsyrdy. Jármeńkege shyǵaratyn taýar túrleri men kólemin arttyrýdy, sondaı-aq turaqtandyrý qory arqyly tıisti jumystardy jandandyrýdy júktedi. Jármeńkede barlyǵy 40 500 dana jumyrtqa, 12 tonna kartop, 12 tonna qııar, 6 tonna et, 5 tonna pııaz, eki tonnadaı balyq, eki tonnadaı taýyq eti, sondaı-aq 1,2 tonna shujyq, 500 kg sábiz, 600 kg qyryqqabat, 600 lıtr sút ónimderi men ózge de azyq-túlik túrleri satyldy.

Pikirler