Bıyl elimizde qoǵamdyq turaqtylyq pen ultaralyq kelisimdi nyǵaıtý maqsatynda qurylǵan Qazaqstan halqy Assambleıasyna 26 jyl toldy. Búginde el turaqtylyǵynyń uıytqysyna aınalǵan bul ınstıtýt — Elbasynyń utqyr ıdeıasy, birlik pen kelisimniń biregeı modeli. Bıyl sáýirde Qazaqstan halqy Assambleıasynyń «Birliktiń, beıbitshilik pen kelisimniń 30 jyly» atty kezekti 29-sessııasy ótip, onda QR Tuńǵysh Prezıdenti – Elbasy Nursultan Nazarbaev táýelsizdik bizdiń qoǵamymyzdyń basty qundylyǵy ekenin atap kórsetti. Táýelsizdik jyldary ishinde Qazaqstan halqy Assambleıasy elimizdiń damýyna aýqymdy úles qosty.
18 birlestiktiń baǵyty
Búgingi kúni Aqtóbe oblystyq Qazaqstan halqy Assambleıasynda 90-nan astam ult ókilderi bar. Sondaı-aq 18 etnomádenı birlestik jumys jasaıdy. Qazirgi tańda ulttyq-mádenı birlestikter qoǵamdaǵy san qyrly máselelerge ún qatyp, óńirde beıbitshilik pen tatýlyqtyń ornaýyna úles qosyp keledi.
BAQ jáne QHA janyndaǵy keńester qyzmetin iske asyrý bóliminiń sarapshy mamany Bekzat Mýldykeshevanyń aıtýynsha, bıylǵy jyly el táýelsizdiginiń 30 jyldyǵyna oraı Aqtóbe oblystyq Qazaqstan halqy Assambleıasy jumys josparyn bekitip, sonyń aıasynda qarqyndy jumys jasaýda.
— Bıyl Aqtóbe oblystyq Qazaqstan halqy Assambleıasy el táýelsizdiginiń 30 jyldyǵyna oraı «Birlik» aqsaqaldar keńesiniń qatysýymen «Táýelsizdik tiregi - birlik» atty qoǵamdyq-mádenı is-sharasyn, analar keńesi men «Qoǵamdyq kelisim» mekemesiniń uıymdastyrýymen «Táýelsiz eldiń arý analary» atty kezdesý ótkizdi. Tuǵyrly Táýelsizdigimizdiń 30 jyldyq mereıtoıy aıasynda ótken bul sharalardyń negizgi maqsaty – óskeleń urpaq boıyna qazaqstandyq patrıotızimdi qalyptastyrý, ulttyq dástúrler men otbasylyq qundylyqtardy nyǵaıtý, etnosaralyq kelisim men urpaqtar sabaqtastyǵyn damytý. Sondaı-aq bıyl Alǵys aıtý kúninde taǵdyr tálkegimen qazaq jerine qonys aýdarǵan túrli ult pen ulys ókilderiniń qonaqjaı qazaq halqyna degen qurmeti men tereń taǵzymyn jetkizgen shara uıymdastyryldy. Bul sharanyń mańyzdylyǵy sonda, bıyl aımaq basshysy etnomádenı birlestikter tóraǵalary atynan «Qoǵamdyq kelisim» mekemesiniń úzdk qyzmetkerine, ártúrli ulttyń 18 balasyn asyrap alǵan, olarǵa qazaq tilin úıretip, mádenıeti men ulttyq ónerine baýlyp júrgen otbasyǵa, sondaı-aq oblystaǵy kópbalaly analarǵa qarjylaı sertıfıkattar tabystap, qoldaý kórsetti. Bul da bizdiń egemendigimizdiń arqasy dep bilemiz, — deıdi ol.
Eń qyzyǵy, bıyl Qazaqstan Táýelsizdiginiń 30 jyldyǵy jáne Qazaqstan kárister Qaýymdastyǵynyń 30 jyldyǵyna oraı QHA ǵımaratynda belgili ánshi, solıst Angelına Iýgaı onlaın rejımde jeke konertin ótkizdi. Talantty ánshi qazaq, orys, koreı, ıtalıan tilderinde jan-jaqty baǵdarlama usyndy. Almatydaǵy Koreı akademııalyq teatry solıstiniń tamasha qoıylymy jerlesimizdiń keremet syıy boldy.
Al maýsym aıynda Aqtóbe oblystyq Qazaqstan halqy Assambleıasynda «Reseı men Qazaqstannyń kópultty shekarasyndaǵy sheteldik shyǵarmashylyqty ádistemelik qamtamasyz etý jáne damytý máseleleri» atty halyqaralyq semınar ótti. Sharaǵa Orynbor MÝ-niń Ońtústik Oral tarıhy men etnografııasynyń ǵylymı-zertteý ınstıtýty, Orynbor oblysy halyqtarynyń Assambleıasy, «Slavıane» Aqtóbe aımaqty ortalyǵy «Kýpava» folk-modern tobynyń kórkemdik jetekshisi V.Sýraı, top ánshisi J.Baıqadamova, «Sýdarýshkı» vokaldyq tobynyń solısi N.Shtempel qatysty. Qazaqstandyq biregeılik pen birlikti nyǵaıtý jáne damytýǵa baǵyttalǵan sharada eki jaqtyń ókilderi qoǵamdyq kelisim men jalpyazamattyq birliktiń qazaqstandyq modeliniń progressıvti damýy týraly pikir almasty.
«Shatlyq» Elbasy saıasatyn qoldaıdy
Búginde Aqtóbe oblysynda 9095 tatar, 809 bashqurt ultynyń ókili turady. Al «Shatlyq» tatar-bashqurt etnomádenı birlestiginiń quramynda 250-ge jýyq múshe bar. 2019 jyly «Shatlyq» tatar-bashqurt etnomádenı birlestiginiń qurylǵanyna 25 jyl toldy. Bul birlestik — oblystaǵy etnomádenı birlestikterdiń arasyndaǵy eń belsendileriniń biri.
— Osynaý shırek ǵasyrda qol jetkizgen jetistikterimizge kóz jibersek, sonyń barlyǵy Elbasymyzdyń kóregen saıasatynyń arqasy dep bilemin. Osydan 25 jyl buryn álemde tuńǵysh ret Elbasynyń bastamasymen Assambleıa sekildi organ quryldy. Sonyń nátıjesinde biz tatý-tátti ómir súrip kelemiz. Qazir bar álem qyzyǵýshylyq tanytyp, Assambleıa qurýdaǵy «Nazarbaev modelin» ýnıversıtetter deńgeıinde oqyp jatyr. Qazaqstannyń syrtqy saıasaty ornyqty bolý úshin áýeli ishki turaqtylyq bekem bolýy kerek. Bárimiz aldaǵy ýaqytta qol ustasyp, Elbasy salǵan sara jolmen alǵa umtylsaq, alynbaıtyn qamal joq. Men úshin Assambleıanyń, ony qalyptastyrýdaǵy Tuńǵysh Prezıdenttiń róli, mine, osynda! Jyl saıyn elordamyzda Elbasynyń qatysýymen Qazaqstan halqy Assambleıasynyń kezekti sessııasy ótedi. Atalǵan jıynǵa biz, ózge ult ókilderi, óńirden delegat retinde qatysyp, óz usynys-tilekterimizdi ortaǵa salamyz. Bıyl da sáýir aıynda ótken dástúrli jıynǵa qatystyq. Al shilde aıynyń basynda oblys ákiminiń qatysýymen Aqtóbe oblystyq Qazaqstan halqy Assambleıasynyń XXIV sessııasy ótti. Onda Qazaqstan halqy Assambleıasynyń oblystyq fılıaly qyzmetiniń tıimdiligin odan ári arttyrý sharalaryn qabyldaý qajettigi aıtyldy, — deıdi «Shatlyq» tatar-bashqurt etnomádenı birlestiginiń tóraıymy Elvıra Habıbýllına.
Aıta ketý kerek, jýyrda ótken Aqtóbe oblystyq Qazaqstan halqy Assambleıasynyń XXIV sessııasynda Qazaqstan halqy Assambleıasynyń 29-sessııasynda qoıylǵan barlyq tapsyrmalardy oryndaý, etnosaralyq salada aqparattyq-profılaktıkalyq jumystardy kúsheıtý, fılıal qurylymdarynyń jumysyn jandandyrý máseleleri qaraldy. Osy oraıda bıyl oblystyq fılıal el táýelsizdiginiń 30 jyldyǵyna arnap tyń jobalardy júzege asyrýdy josparlap otyr. Ókinishke qaraı, eldegi epıdemıologııalyq jaǵdaıǵa baılanysty bul baǵyttaǵy is-sharalar tek onlaın formatta ótýde jáne birqatary keıinge shegerilgen.
Danagúl BAIMUQASh,
"Adyrna" ulttyq portaly.
