Qyrǵyzstannyń Halyq jazýshysy Shyńǵys Aıtmatovtyń qabirin belgisiz bireýler búldirip, túndigin alyp ketken. Bul týraly telejúrgizýshi Assol Moldokmatova jazdy, dep habarlaıdy «Adyrna» tilshisi.
«Jazýshynyń uly kásibı mamandarmen aqyldasa otyryp, biryńǵaı sáýlet ansamblin muqııat oılastyrdy. Barlyǵy Asqar Shyńǵysulynyń jeke qarajatyna quryldy. Ol ákesi týraly estelikke qurmetpen jáne muqııat qaraıdy. Biz keshirip surap, tez arada túndikti qalpyna keltirýimiz kerek", - dedi ol.
Shyńǵys Tórequluly Aıtmatov – jazýshy, qoǵam jáne memleket qaıratkeri. Shyńǵys Aıtmatovtyń búkil shyǵarmashylyǵy men ómiri bastan-aıaq qazaq halqymen tyǵyz baılanysty boldy. Sonaý «Jámıladan» bastap, álemge tanymal «Qosh bol, Gúlsary», «Aq keme», «Ǵasyrdan da uzaq kún», «Janpıda» sııaqty barlyq shyǵarmalaryndaǵy kórkem obrazdarynyń rýhy men minezi halqymyzǵa óte-móte jaqyn edi.
«Adyrna» ulttyq portaly