Qyzylorda oblysy Aral aýdanynda qurǵaqshylyq pen mal azyǵynyń jetispeýine baılanysty tótenshe jaǵdaı rejımi engizildi, - dep habarlaıdy "Habar 24" jáne inbusiness.kz.
Maýsymnyń basynda aýdanda 500 sıyr men jylqy qyrylǵan. Onyń negizgi sebebi - jaıylymdar, aýa raıynyń ystyq bolýy jáne Syrdarııa ózeniniń sýy az bolýy. Jaıylymdardyń 90 paıyzy jaýyn-shashynnyń azdyǵynan jaramsyz bolyp qalǵan.
Ákimdik tótenshe jaǵdaı rejımin jarııalaýǵa qujattardy bir aıdaı daıyndaǵan. Qujat Ádilet mınıstrliginde tirkeldi.
Búginde jaǵdaıdyń táýlik boıy monıtorıngi uıymdastyryldy. Kórshi aýyldarda shabyndyqqa tartylǵan eriktiler brıgadasy quryldy. Eriktiler Qazaly, Qarmaqshy jáne Syrdarııa aýdandarynda jumys isteıdi.
Aqtóbe oblysymen de kelisim bar. Yrǵyz aýdanynyń sharýashylyqtary qol jetimdi baǵamen jem berip qana qoımaı, jaıylymdyq jerlerin shóp shabý úshin paıdalanýǵa múmkindik berip otyr.
"Qurǵaqshylyqtyń saldaryn joıý jumystaryna aýdanǵa eki mıllıard teńgege jýyq qarajat qajet bolady. Biz "qyzyl" aımaqqa engizgen osy 13 aýdanda sýǵa 15 uńǵyma burǵylanady. Jaıylymdardy tolyq paıdalaný jáne ulǵaıtý úshin segiz kanal qazylyp, tazartylady. Sonymen qatar, osy jumystardy júrgizýge tehnıka qoıýymyz kerek", - dedi Aral aýdanynyń ákimi Serik Sermaǵanbetov baspasóz máslıhatynda.
Ákimniń sózinshe, aýdanda 205 myń bas mal bar.
"Olarǵa shamamen 185 myń tonna shóp qajet. Aýdan óz kúshimen 36 myń tonnadan asa shópti qamtamasyz etedi, qalǵany oblystyń basqa aýdandarynan jáne óńirlerden ákelinedi", - dedi aýdan ákimi.
Tótenshe jaǵdaı rejımin jarııalaý aýyl sharýashylyǵy mınıstriniń otstavkaǵa ketýimen baılanysty ma degen suraqqa Sermaǵanbetov:
"Meniń oıymsha, bul mınıstrdiń otstavkaǵa ketýimen baılanysty emes. Qazaqstan Respýblıkasynyń aýmaǵynda buryn-sońdy qurǵaqshylyq saldarynan TJ rejımi engizilmegen. Qazirgi TJ rejımi el tarıhynda birinshi. Buǵan deıin TJ Qazaqstanda 1975 jyly jarııalanǵan bolatyn".
