Aqtóbede Elorda kúnine oraı Trıatlon parki ashylyp, fýtboldan halyqaralyq týrnır uıymdastyryldy dep habarlaıdy "Adyrna" ulttyq portalynyń tilshisi.
Qazaqstan Táýelsizdiginiń 30 jyldyǵyna jáne Elorda kúnine arnalǵan «Densaýlyq jarysy» sporttyq sharasy jańadan paıdalanýǵa berilgen Trıatlon parkiniń aýmaǵynda ótti.
Bıznestiń áleýmettik jaýapkershiligi aıasynda paıdalanýǵa berilgen Trıatlon parkiniń uzyndyǵy — 2,5 shaqyrym. Munda velosıpedshilerge, jeńil atletterge jáne jaıaý júrginshilerge arnalǵan arnaıy jolaqtar bar.
Sharanyń ashylýynda quttyqtaý sóz sóılegen oblys ákimi Ońdasyn Orazalın táýelsizdik jyldarynda oblys kóleminde buqaralyq sportqa jaqsy kóńil bólinip, sporttyq sharalar men salaýatty ómir saltyn qalyptastyrýǵa jan-jaqty jaǵdaı jasalyp jatqanyn atap ótti.
- El Táýelsizdiginiń 30 jyldyǵy jáne Elorda kúni qarsańynda uıymdastyrylyp otyrǵan bul shara qalamyzdaǵy kóptegen sportsúıer qaýymynyń kóz qýanyshyna aınalyp otyr. Mereke qarsańynda Batys óńirinde teńdesi joq trıatlon saıabaǵynda jaıaý júrginshilerge, veloshabandozdarǵa jáne júgirýshilerge arnalǵan jol el ıgiligine paıdalanýǵa berilip otyr. Aldaǵy ýaqytta saıabaqtyń ishin abattandyryp, otyrǵyshtar qoıyp, túrli jemis aǵashtaryn otyrǵyzyp, kógaldandyrý jumystaryn odan ári arttyra túsemiz. Bul saıabaqta qala turǵyndarynyń emin-erkin serýendep, sportpen shuǵyldanyp, jaqsy demalýyna barynsha qolaıly jaǵdaı jasalatyn bolady, — dedi O.Seıiluly.
Budan keıin oblys ákimi Qazaqstan Táýelsizdiginiń 30 jyldyǵyna jáne Elorda kúnine oraı fýtboldan oblys ákiminiń kýbogy úshin uıymdastyrylǵan V halyqaralyq týrnır jeńimpazdaryn marapattaý sharasyna qatysty.
Týrnırge 8 komanda qatysyp, jarys qorytyndysy boıynsha kórshiles Ózbekstan Respýblıkasynyń «Býnedkor» komandasy I oryndy jeńip alsa, II oryndy Aqtóbe fýtbol komandasy, III oryndy ózbekstandyq «Nasaf» fýtbol komandasy ıelendi.
Sharada Aqtóbe oblysy ákiminiń kýbogy týrnıri eń perspektıvaly jáne dástúrli túrde bola alatyn barlyq múmkindikterge ıe bolyp otyrǵandyǵy aıtyldy.
Sharalardan keıin óńir basshysy Aqtóbe qalasyndaǵy «Ten Qogam» múgedekterdi áleýmettik qoldaý ortalyǵyn aralap kórdi.
«Aqtóbe qalalyq sal aýrýyna shaldyqqan azamattardy qoldaý ortalyǵy» qoǵamdyq birlestigi dırektory Quralaı Baımenova oblys ákimine jańa ǵımaratty kórsetip, uıymnyń jumysymen tanystyryp ótti.
Atap óteıik, búgingi kúni oblysta 27 550 múgedek turady, onyń ishinde 4 292 18 jasqa deıingi múgedek balalar. Bul joba «Nur Otan» partııasy saılaýaldy baǵdarlamasynyń «Ózgerister joly: barshaǵa laıyqty ómir!» jol kartasy aıasynda memlekettik-áleýmettik tapsyrys sheńberinde múgedekterdiń ómir súrý sapasyn jaqsartý maqsatynda júzege asyrylýda.
Jobanyń maqsaty - múgedekterdi psıhologııalyq qoldaý, jumyspen qamtýǵa járdemdesý jáne izdeý, jumysqa ornalastyrý jáne jumys ornyn saqtaý salasyndaǵy áleýetti arttyrý, múgedekterdi turmystyq jáne áleýmettik daǵdylarǵa úıretý maqsatynda tıimdi ómir súrý olardy qoǵamǵa beıimdeý. Ortalyqta quqyqtyq, psıhologııalyq, áleýmettik-pedagogıkalyq, bilim berý jáne basqa máseleler boıynsha aqparattyq, konsýltaııalyq jáne resýrstyq qoldaý, kúndelikti jáne áleýmettik daǵdylardy, sonymen qatar qazirgi zamanǵy adamnyń daǵdylaryn úıretý jumystary jaqsy jolǵa qoıylǵan. Munda jyl aıaǵyna deıin aı saıyn 30 jáne odan da kóp adamǵa múmkindigi shekteýli 200 adamǵa qyzmet kórsetý josparlanyp otyr. 2021 jyly oblysta jumyspen qamtýǵa járdemdesýdiń qoldanystaǵy baǵdarlamalary sheńberinde 883 múgedekti jumysqa ornalastyrýǵa kómek kórsetý josparlanýda. Aǵymdaǵy jyldyń 1 shildesindegi jaǵdaı boıynsha 479 múgedek nemese 54,3% turaqty jáne ýaqytsha jumyspen qamtylǵan.
"Adyrna" ulttyq portaly.
