Jańaózende munaıshylar taǵy da ereýilge shyqty. "Kezbı" seriktestiginiń 500-ge jýyq jumysshysy jalaqyny kóbeıtip, áleýmettik jaǵdaıdy rettesin degen talap qoıǵan, dep habarlaıdy KTK arnasy.
“Qasym-Jomart Kemeluly Toqaev, Asqar Mamın, Úkimet basyndaǵylar, bizdiń Qazaqstan Respýblıkasynyń azamaty retinde, ózimizdiń zańdy quqyǵymyzdy qorǵaýdy suraımyz”, – deıdi munaıshylar.
"Ózenmunaıgaz" kompanııasyna servıs qyzmet kórsetetin "Kezbı" seriktestiginiń jumysshylary tańnan beri narazylyq bildirýde. Tehnıkalaryn qańtaryp qoıyp, jumysty múlde toqtatyp tastaǵan. Sebebi, jumys berýshi Eńbek kodeksin buzyp, zańdy belsheden basyp otyr deıdi jınalǵandar.
Munaı uńǵymalaryna kúrdeli jóndeý júrgizetin jumysshylar táýligine 11 saǵat jumysqa jegiledi eken. Alatyn aılyǵymyz 200 myń teńgeden aspaıdy deıdi. "Ózenmunaıgazda" isteıtinderdiń jalaqysy bizden úsh ese kóp dep nalyp otyr. Tipti tehnıkalar tozyp, vahtalyq ádispen jumys isteıtinderge esh jaǵdaı jasalmaǵan kórinedi. Al jergilikti ákimdik jumysshylardyń talabyn jaqyn arada shesheýge tyrysamyz deıdi.
“Aryz-talaptardy qazir, tez arada sheshý úshin jumys berýshi arasynda arbıtrajdy komıssııa qurylyp jatyr. Sol arbıtrajdy komıssııada barlyq aryz-talaptar zańda belgilengen merzimde qaralady”, – deıdi Jańaózen qalasy ákiminiń orynbasary Ǵalym Baıjanov.
