Qaıǵyly oqıǵa 30 maýsym kúni Naýryzbaı aýdanyna qarasty Abaı aýylynda bolǵan. Dárethana tesigine túsip ketken 1 jasar qyzdy qutqaramyn dep shuńqyrǵa aldymen 12 jasar aǵasy, artynan ákesi, sosyn ájesi túsken. Qutqarýshylar tek otaǵasyn aman alyp qala aldy dep habarlaıdy oblystyq TJD-nyń respýblıkalyq jedel qutqarý jasaǵy.
Oqıǵa bolǵan jerge atalǵan jasaqtyń alty adamy dereý jetken. Olar dárethana shuńqyrynan 4 adamnyń bárin alyp shyqqanymen, tek bireýi ǵana tiri dárigerlerdiń qolyna berilgen.
Anyqtalǵandaı, shuńqyrǵa aldymen 2020 jyly týǵan qyz bala qulap ketken. Ony ózdigimen qutqarmaq bolǵan 2009 jylǵy aǵasy tesikke túsip, shyǵa almaı qalǵan. Balalaryna kómektespek bolǵan ákesi men ájesi (1955 jyly týǵan) de sol shuńqyrdyń gazyna ýlandy.
Qazir balalardyń ákesi aýyr halde aýrýhanada jatyr. Qalǵan úsh adam jedel járdem kelgenshe jan tapsyrǵan.
