Elimizde sońǵy kezderi azyq-túlik baǵasynyń, sonyń ishinde kókónisterdiń baǵasynyń qymbattap jatqany belgili. "Adyrna" ulttyq portalynyń tilshisi Almaty qalasyndaǵy dúkender jelisi men jemis-jıdek (kókónis) satatyn oryndarǵa baryp, baǵanyń qalaı ózgergenin bilip qaıtty.
Otandyq kartop baǵasy - 235 teńge bolsa, Egıpetten kelgen kartoptar dúkenderde 399 teńgeden satylyp jatyr. Kapýsta - 119, jýa - 113 teńge. Al jas sábiz baǵasy - 507 teńgege deıin kóterilgen.
Osy turǵyda jemis-jıdek satatyn oryndardaǵy saýdagerler baǵanyń ósýine qatysty oılaryn da aıtty.
"Bir otbasyǵa bir paket kartop. Odan artyq alýǵa bolmaıdy. Birneshe adam bolyp kelseńiz de, bir paket kartop ala alasyz. Bizge berilgen tapsyrma osyndaı. Baqylaýda ustaýymyz kerek. Áıtpese, basqalarǵa, azyq-túlikti qajetsinip otyrǵan adamdarǵa kartop jetpeı qalýy múmkin", - deıdi satýshy.
Odan bólek satýshylardyń sózderinen otandyq ónim baǵasynyń asa qymbattamaǵanyn, al sheteldik taýarlardyń joǵary baǵada satylyp jatqanyn bile aldyq.
"Otandyq ónim, elimizde ósirilgen kókónister arzan baǵada satylyp jatyr. Alaıda Ózbekstannan kelgen ónimder men Egıpetten keletin kartop baǵasy qymbat. Sonymen qatar otandyq sábiz baǵasy da aspandap tur", - deıdi taǵy bir saýdager.
Aqmaral BEREKET,
"Adyrna" ulttyq portaly
