Túrkistan oblysy Tóle bı aýdanynyń turǵyndary ákimdik ókilderine bazynalaryn jetkizý úshin joldy jaýyp tastady. Sheneýnikter qarapaıym halyqtyń jaǵdaıyn oılaýdyń orynyna baılardyń aqshasyna baılanyp qalǵan, deıdi. Sebebi aýyldyń joǵarǵy jaǵynda ornalasqan demalys aımaqtarynyń basshylary taýdan keletin sýdy basseınderge buryp alyp, eldimekenderdi aptap ystyqta qańsytyp qoıypty. Onymen qosa las sýlaryn tómen qaraı aǵyzyp oılaryna kelgendi istep otyr dep ashynady. Bul týraly «Adyrna» ulttyq portaly «Eýrazııa» birinshi arnasyna silteme jasap habarlaıdy.
Tańerteńnen demalys aımaqtaryna baratyn joldy japqan halyqtyń shydamy shegine jetken. Olardyń aıtýynsha, demalys oryndarynyń basshylary taýdan keletin sýdyń arnasyn basseınderge buryp alyp, tómendegi aýyldarǵa tirshilik nárin jetkizbeı qoıypty. Tipti, kanalızaııadan shyqqan las sýlaryn aǵyzyp, halyqty ábden ábigerge túsirgen. Jergilikti bılikke jaǵdaılaryn aıtyp shyryldaǵanymen, qulaq asatyn bir atqa minerdiń tabylmaǵanyna 5 jyldyń júzi bolǵan.
«Olardyń kanalızaııasy joq. Mýsorlarynyń bárin shyǵarady ony biz ishemiz. Endi sol mýsor sý da joq bizde. Basseın toltyryp jatyr, sý iship jatyr. Al bizde halyqta sý joq. Adam shomylady bizde sý joq. Baılar bárin jaýyp alǵan, sýlardy alyp alǵan bólek-bólek. Oǵan mynalardyń kúshteri kelmeı jatyr. Qoldarynan kelmeı jatyr», - deıdi Ekpindi aýylynyń turǵyny Klara Eralıeva.
Tóle bı aýdanyna qarasty úsh aýyldyń jyry munymen bitpeıdi. Eldimeken irgesindegi jerlerdiń kóbisi jekeniń qolyna satylyp ketip, saldarynan jaılym jer de qalmaǵan. Al, aýyz sýǵa zar bolyp otyrǵan kezde, sýarmaly sýdy suraýǵa uıalatyn shaqqa jettik, deıdi.
«Ol jerdegilerdiń barlyǵy mýsor tastaıdy. Shomylady mýsor sodan balalar aýrý qazir. Balalarymyzdyń barlyǵy aýrý jylap jatyr. Halqymyzǵa bir aýyz sý joq. Sonda qaltalylar ómir súredi da, bıshara halyq degen qalaı ómir súredi bular?» - deıdi Ekpindi aýylynyń turǵyny Tańsyqkúl Seksenbaeva.
Bir saǵatqa jýyq joldy jaýyp tastaǵan turǵyndarmen kezdesýge kelgen aýdan ákiminiń orynbasary sý máselesin bir aptada sheship beremin dep, jınalǵandar aldynda ant-sý ishti. Dese de káriz júıesinen aǵyp jatqan las sýdy birinshi ret estip turmyn dep aıdy aspannan biraq shyǵardy.
«Bul birneshe jyldan beri kóterilip kele jatqan másele. Biraq birneshe jyldan beri biz máselemen kúresip kele jatyrmyz. Biz zań aıasynda baryn aıtyp túsindiremiz, zań aıasynda talap etemiz, zań aıasynda sony istetemiz. Biraq osyndaı sezon bastalǵan kezde ókinishke oraı keıbir demalys oryndarynyń ıeleri bylaısha aıtqanda zańsyz, naglyı obrozom ortalyq aýyzsý qubyryna qosylp alyp, sod jerde basseınderin toltyryp jatyr», - deıdi Tóle bı aýdany ákiminiń orynbasary Lesbek Serikbaev.
«Bastaýyn taýdan alatyn «Birkólik» ózeniniń bas jaǵyndaǵy sıqy osyndaı. Kúl-qoqys, baklajkalardan aıaq alyp júrý múmkin emes. Al bul ózen aýlyǵa jetkenge deıin on shaqty demalys aımaqtarynan ótedi. Aǵyn sýdyń aramy joq degen turǵyndar osy sýdy ishýge májbúrmiz dep otyr», - deıdi Ǵalymjan Kenjebek.
Al aýdan basshylary apta kóleminde jaǵdaıdy retke keltiremiz dep ýádesin berdi. Endi ashýǵa býlyqqan turǵyndar sheneýniktiń sózine senbese de, bir juma kútýge daıyn ekenderin jetkizdi. Al ýáde sol kúıinde oryndalmaı qalatyn bolsa, demalys aımaqtaryna baratyn joldy betondap jaýyp tastaımyz dep tarqasty.
"Adyrna" ulttyq portaly
