Mańǵystaý oblysynda malmen ǵana kún kórip otyrǵan Qyzan men Aqshymyraý aýylynynyń turǵyndaryna qýańshylyqtyń kesiri qatty tıip otyr.Turǵyndar maldy aman alyp qalýǵa 204 mılııon teńgeniń ózi azdyq etetinin aıtady, dep habarlaıdy 31 arna.
Biz turǵan myna Qyzan aýylynda 2 myńǵa jýyq halyq bar. Osy aýyldyń turǵynynyń bári qazir tek qana malmen kúneltip otyr. Al óńirdi jaılaǵan qýańshylyq búkil mańǵystaýlyqtardyń basty máselesine aınaldy. Basqa óńirden jetkizilgen qymbat shópti de jep semirip jatqan joq.
“Malymdy aman alyp qalam dep. Basy-kózine qaramaı, pensııasyn, aqshasyn soǵan salyp, kúneltip jasap jatyr. Óletini ólip jatyr dalada”, – dedi Qyzan aýylynyń turǵyny Álimbaı Amanov
72 jyl boldy birinshi ret kórdim mynadaı qýańshylyqty. Jutty kórgenimiz joq edi. Qýańshylyq, joqshylyq bári qat-qabat bolyp tur ǵoı”, – dedi turǵyn Balatóre Altybaev.
Buǵan deıin aýyl sharýashylyǵy mınıstrligi Mańǵystaý óńirindegi maldardy aman alyp qalýǵa 204 mıllıon teńge qarajat bólingenin aıtqan edi. Sol aqsha esebinen Mańǵystaý, Túpqaraǵan, Munaıly, Qaraqııa aýdany men Jańaózen qalasynyń ár qaısysyna 130 tonna arpa jetkizilgen. Alaıda kómek shalǵaıdaǵy sharýalarǵa tımepti. Aýyl ákimi oblys ákimdiginen bólingen qarajatqa alynatyn jem-shópti jetkizý úshin ótinim jiberip qoıǵanyn aıtady. Mal azyǵyn tasymaldaýmen aınalysyp jatqan óńirdegi «Kaspıı» áleýmettik kásipkerlik korporaııasy taýardy tek aýdan ortalyqtaryna ǵana jóneltipti. Alaıda aýdan ortalyǵynan 110 shaqyrym jerde ornalasqan Qyzan aýylynyń turǵyndaryna ony ózdiginen tasý qıyn.
“Biz endi halyqtan kerek adamdardyń tizimin shyǵaramyz. Soǵan baılanysty aýdandyq aýyl sharýashylyq bólimine usynysymyzdy túsiremiz shóp kerek dep”, – dedi aýyl ákimi Qonaı Súleımenov.
Al aýyl sharýashylyǵy mınıstrligi óńirdegi jaǵdaıdy jergilikti ákimdik ýaqytynda habarlamaǵandyqtan qazirgi ahýaldyń qıyndaǵanyn aıtady. Q
“Ólgen malǵa qarjy qarastyrylmaıdy. Tek qazir bar maldy saqtaýǵa qarajat bólinedi. Aýdandyq ákimdikter qýańshylyq jóninde erterek habarlamady. Jaǵdaı ýshyqqansha kútpeý kerek edi”, – dedi aýyl sharýashylyǵy mınıstrligi departament dırektorynyń orynbasary Qaırat Mýtaev.
Qyzan aýylynda qurǵaq jerden azyq tappaı qyrylyp qalǵan maldan qalǵany 5500 jylqy, 2700 túıe, 13 myń qoı men eshki. Endi qalǵan maldy saqtap qalý úshin shalǵaıdaǵy sharýalar úkimetten qoljetimdi baǵada jem men shópti aýylǵa deıin tasymaldaýdy uıymdastyrýyn suraıdy.
Eske sala keteıik, Mańǵystaý oblysynda ashtyqtan qur súıegi qalǵan jylqylardyń sýretterin Facebook qoldanýshysy Berdimurat Tórekenov túsirgen bolatyn. Mańǵystaý oblysynyń birneshe aýylynda jylqylar joıylý aldynda tur. Bıyl jaýyn-shashyn bolmaǵandyqtan, jaıylymdar keýip qalǵan, jylqy azyǵynyń jetispeýinen ony tamaqtandyratyn jem qalmaǵan.
