Qazaqstandyq boksshy Fırýza Sharıpova Dúnıejúzilik boks qaýymdastyǵynyń (WBA) áıelder arasyndaǵy jeńil salmaqtaǵy jańartylǵan reıtıngisinde birinshi orynǵa kóterildi, dep habarlaıdy «Adyrna» tilshisi Prosports.kz-ke silteme jasap.
Jeńil salmaqta ırlandııalyq Ketı Teılor – áıelder arasynda absolıýtty álem chempıony. Sharıpova ekinshi orynnan birinshige qatarǵa kóterilip, WBA tujyrymy boıynsha Teılormen jekpe-jektiń mindetti úmitkeri atandy.
Irlandııalyq boksshy aldyńǵy jekpe-jegin brıtanııalyq Natasha Djonasqa qarsy ótkizdi. Bul jekpe-jek teń dárejede ótip, ırlandııalyq áıel mınımaldy eseppen jeńdi: 96-95, 96-94, 96-95. Negizgi gonorar (bonýsty qospaǵanda): Teılor – 1,38 mıllıon dollar, al Djonas – 485 myń. Eger Fırýza Sharıpova Ketı Teılormen jekpe-jek ótkizip, jeńiske jetse, jeńil salmaqtaǵy basty tórt belbeýdiń basyn qosady.
Bul Qazaqstan úshin jańa rekordtyq jetistik bolmaq. Eń tanymal qazaqstandyq boksshy Gennadıı Golovkın tek úsh negizgi tıtýlǵa ǵana ıe bolǵan. Sharıpova kásipqoı mansabyndaǵy basty maqsaty álemniń absolıýtty chempıony bolý ekenin málimdedi.
«Adyrna» ulttyq portaly
