Dýbaıda bokstan Azııa chempıonatynyń alǵashqy fınaldyq básekeleri márege jetti. Áıelder arasyndaǵy synda Qazaqstan komandasy segiz altyn ıelenip, jalpy esepte kósh bastady, dep habarlaıdy «Adyrna» tilshisi Olympic.kz-ke silteme jasap.
Erik Alǵabek jattyqtyratyn qazaqstandyq boksshy qyzdar Azııa birinshiligin 8 altyn, 1 kúmis jáne 1 qola medalmen aıaqtap otyr. Bizdiń komanda sapynan Alýa Balqybekova (48 keli), Nazym Qyzaıbaı (51 keli), Dına Jolaman (54 keli), Rımma Volosenko (60 keli), Mılana Safronova (64 keli), Valentına Halzova (69 keli), Farıza Sholtaı (81 keli) jáne Lázzat Kúngeıbaeva (+81 keli) chempıon atandy.
Vladıslava Kýhta (57 keli) aqtyq synda súrinip, kúmis júldeger atansa, Marına Volnova (75 keli) qurlyq dodasynyń qola medalin taǵyndy. Bul bokstan Qazaqstan áıelder komandasynyń rekordty kórsetkishteriniń biri. Buǵan deıin qazaqstandyqtar Azııa birinshiliginen segiz altyn almaǵan bolatyn.
Erteń erler arasyndaǵy fınaldyq jekpe-jekter ótedi. Aqtyq aıqasta Qazaqstan komandasynyń bes ókili baq synaıdy.
«Adyrna» ulttyq portaly
