Mańǵystaýdaǵy Bozjyra shatqalynyń mańaıy qoqysqa tolyp qalǵan, dep habarlaıdy "KTK" arnasy.
"Qyzylsaı" tabıǵı parkiniń ınspektorlary osylaı dep dabyl qaǵyp otyr. Kúndelikti kelip-ketken týrıster artynan iship-jegen qaldyǵyn tastap, analany bylǵap ketedi eken.
Bozjyrany tamashalaýǵa sońǵy eki aıda 2 myńǵa jýyq saıahatshy kelgen. Olardyń árqaısysynyń artyn jınap júrýge ınspektorlardyń múmkindigi joq. Ár adam óziniń qoqysyn alyp ketse, aınala taza bolatynyn aıtady olar.
Ańyzaq dala, oıys-shuńqyrly qumdy jol, shóldi landshaft. Tabıǵattyń ǵajap týyndysy sanalǵan Bozjyraǵa jetý joly ońaı emes. Tańdaı qaǵyp tamsanatyn qyrattar Jabaıushqan qaýmalynyń bir bóliginde ornalasqan. Áktastardan quralǵan taýlardyń bıiktigi 250 metrge jetedi. Jurtty qyzyqtyratyny da sol.
Bozjyra shatqalyndaǵy kórinisti tamashalaýǵa týrıster Aqtaýdan 300 shaqyrym jol júrip keledi. Ǵalymdardyń zertteýinshe, bul jer ejelgi Tetıs muhıtynyń túbi bolǵan. Qamal ispettes, azý tistes taýlar burynǵy muhıt shógindileri.
Kórikti jerdi kórýge keletinder kún sanap kóbeıip keledi. Biraq bári birdeı tazalyq saqtamaıdy deıdi ınspektorlar. Keıbiri ot jaǵyp, ishimdik bótelkesi men tamaq qaldyqtaryn dalaǵa shashyp ketedi eken. Tipti keıde qoqysty jınap úlgermeıtinin aıtady. Olar Bozjyrany kórýge kelgenderge tamaq iship tynyǵatyn oryndar salynsa degen nıet bildirdi.
“1-naýryzdan beri osy týrıstik marshrýttyń jumysy bastalǵaly 2000-ǵa jýyq adam keldi. Meıram kúnderi odan da kóp keledi. Barynsha eskertip nusqaýlyq beremiz. Bul jerde ot jaǵýǵa bolmaıtynyn, qoqys tastaýǵa bolmaıtynyn aıtamyz. Biraq týrısterdiń barlyǵyn birdeı baqylaı almaı otyrmyz. Sol sebepti osy arada bolashaqta týrısterdi retteıtin bir oryn salynsa degen usynysymyz bar”, – deıdi "Jabaıushqan" tabıǵı qaýmalynyń aǵa ınspektory Naýryz Ánesov.
“Ortalyq salýdaǵy maqsat – transporttyń júrisin báseńdetý. Týrısterdiń qozǵalysyn tártipke keltirý kerek.Olardy qabyldaýǵa aldymen joǵarydan jol salyný kerek. Josaly arqyly túsetin 18 km jol bar. Mine, osyny asfalttaý kerek. Esh shań shyqpaý kerek”, – deıdi ekolog Orynbasar Toqjanov.
Alaıda Bozdjyrada qonaq úı men demalys ornyn salýǵa ekiniń biri kelise bermeıdi. Taý-tasty kezgen týrıster tek qoqys tastaıtyn jáshik pen ájethana qoısa jetip jatyr deıdi. Al tumsa tabıǵatqa tıispesin degen pikirde.
“Qoqys tastaıtyn jerler bolsa. Bylaı bári jaqsy. Bul dala, dalaǵa asfalt salmaıdy ǵoı. Dala joly osyndaı bolady, tabıǵattyń baılyǵy ózi osy”, –deıdi saıahatshy Janqanat Yrzyqbaı.
Tabıǵı aýmaqtyń ınspektorlary erekshe jerdi saqtaý úshin, Bozjyra aýmaǵyna kirýdi kóktemnen bastap aqyly etip qoıǵan. Bul jabaıy týrızmmen kúresýdiń alǵashqy qadamy. Jınalǵan aqshaǵa qoqys jáshigin ornatyp, shlagbaým qoıý úshin tıisti organdarǵa hat jiberip qoıǵan.
