Türkıstan oblysynyŋ Kentau qalasynda qūrylysy byltyr aiaqtalǧan daiyn päterler älı künge qaŋyrap bos tūr. Su jaŋa baspananyŋ qoldanysqa berılmeuıne kögıldır otyn men jylu qazandyǧynyŋ ortalyqqa qosylmauy sebep, dep habarlaidy Azattyq Rýhy.
Kentauda qaŋyrap tūrǧan üilerdıŋ qūrylysy 2020 jyldyŋ küzınde aiaqtalǧan. Tüskeidegı kenşıler qalasynda 5 myŋnan astam adam üidıŋ kezegınde tūr. 5 qabatty 10 üi jospar boiynşa päter kezegınde tūrǧan 600 otbasyna berıluı tiıs edı. Bıraq, on jyldam astam üi kezegınde tūrǧan kentaulyqtar daiyn üidı ala almai otyr. Olardyŋ arasynda mügedek, köp balaly otbasy syndy äleumettık osal toptarǧa jatatyn janūialardyŋ sany az emes. Qonys ielerın kütıp tūrǧan päterler de däl osy äleumettık jaǧdaiy naşar, jetım balalar, köpbalaly analar, biudjettık salanyŋ qyzmetkerlerı, apatty üidıŋ tūrǧyndary syndy barlyǧy bes sanatqa jatatyn adamdarǧa berıluı tiıs bolǧan.
«Üş balamnyŋ ekeuı mügedek. Ekı bölmelı päterdı jaldauǧa aqşamyz jetpegendıkten bır bölmelı tar üidı jaldadyq. 9 jyl boldy üidıŋ kezegın kütıp jürgelı. Mügedektıkke alyp otyrǧan järdemaqyny ne tamaqqa jetkıze almaimyz, ne kiımge jetkıze almaisyŋ. Päteraqysy bar, būlardyŋ ışetın därısı bar. Özımnıŋ därıme de jetpei qalatyn künder bolady», - degen edı ötken jyly BAQ ökılderıne bergen sūhbatynda Aigül Qūdaibergenova.Arada 8 ai ötse de mäsele sol qalpy şeşılmegen. Qaŋyrap tūrǧan ärbır üide 60 päter bar. Jaŋadan salynǧan üiler ortalyq jylu qazandyǧyna qosylmaǧan. Tabiǧi gaz tapşy, Kentau qalasyndaǧy gaz qysymy tömen. Qūrylys-montaj jürgızgen mergıder kompaniia bolsa daiyn üidı qalanyŋ qaramaǧyna ötkıze almai, küzetumen keledı. Qala äkımı bastapqy jobada jylu beru jüiesı naqty körsetılmegenın, ortalyq jylu qazandyǧyna qosuǧa qarajat joǧyn aityp otyr.
«Belgılengen uaqytta berılmeuınıŋ sebebı, atalmyş köpqabatty üilerdıŋ jylytu jüiesı gazben jylytuǧa arnalǧan. Bügıngı taŋda qalaǧa gaz beru jūmystary jürgızılude. Komissiia öz jūmysyn aiaqtaǧan soŋ tūrǧyn üi kezekpen tūrǧyndarǧa berıletın bolady. Kentau qalasyn tabiǧi gazben qamtamasyz etu maqsatynda 2017 jyly qūrylysy aiaqtalǧan «Beineu-Şymkent» magistraldy gaz qūbyrynyŋ 1230 şaqyrymynda №14 «Qyzyläsker» avtomattandyrylǧan gaz taratuşy stansasy Kentau qalasyna deiın gaz taratu qūbyryn saludy merdıger «Gazovoe hoziaistvo «Şymkentgaz» JŞS atqarǧan. №14 «Qyzyläsker» AGTS boiynşa qazırgı taŋda merdıger mekeme tarapynan qaita qysymmen tekseru jūmystary jürgızılude. Tekseru jūmystary tolyqqandy aiaqtalǧannan keiın magistraldy qūbyrǧa qosylu jäne toltyru jūmystary jürgızıletın bolady», - dep habarlady Türkıstan oblysy Kentau qalasy äkımdıgınıŋ baspasöz qyzmetı.Oblystaǧy gaz tartu jūmystaryna qatysqan kompaniialardy tızıp şyqqan äkımdık ökılderınıŋ habarlamasynan ūqqanymyz – Kentau qalasyn kögıldır otynmen qamtamasyz etu tolyqqandy jürgızılmegen. Al, jalpy aumaǧy 33 470 şarşy metrdı qūraityn tūrǧyn üilerdı saluǧa biudjetten 3,9 mlrd teŋge jūmsalǧan.
«Kentau qalasyn tabiǧi gazben qamtamasyz etu (saqinalau jäne I, III kezeŋder) merdıger mekemeler «Jol serık» JŞS jäne «Kombi Stroi-1» JŞS tarapynan qūrylys montaj jūmystary jürgızılgen. Būl jūmystar 2019 jyly aiaqtalyp qabyldandy. Saqinalau jäne I, III kezeŋderınıŋ qūjattary «QazTransGaz Aimaq» AQ-na tırkelgen. Gaz qūbyrynyŋ 2-kezeŋı käzırgı taŋda tolyǧymen aiaqtalmaǧan. Merdıger mekeme «Yntymaq Qūrylys» JŞS-ı tarapynan nysandy aǧymdaǧy jyldyŋ soŋyna deiın tapsyryluy qajet. Joǧaryda atalǧan jūmystar tolyqqandy aiaqtalǧannan keiın qalaǧa tabiǧi gaz berıletın bolady. Salynǧan köpqabatty tūrǧyn üilerdıŋ aulasyna injenerlık infraqūrylym jelılerın jürgızu jäne abattandyru boiynşa bügıngı taŋda 3 aulanyŋ qūrylys jūmystary aiaqtalǧan», - dep jauap berdı äkımdıktıŋ baspasöz qyzmetı.
Ūqsas jaŋalyqtar
