Qaraǵandy oblysynyń ıývenaldy sotynda Sátbaev qalasyndaǵy jappaı tártipsizdikke qatysqan 55 adamǵa qatysty úkim shyqty. Olar eki qylmystyq bap - «jappaı tártipsizdik» jáne «bılik ókiline qatysty zorlyq-zombylyq» boıynsha kináli dep tanyldy dep habarlady azattyq-ruhy.kz.
Sottalýshylar taǵylǵan aıypty moıyndap, prokýrordyń sottan suraǵan jazasymen kelisti. Toǵyz adam úsh jylǵa bas bostandyǵynan aıyrylsa, taǵy 44 sottalýshy tórt jylǵa shartty túrde jaza aldy. Qalǵan eki adamn bir jarym jylǵa shartty túrde bas bostandyǵynan aıyryldy.
Sotta 49 er adam men 6 áıelge qatysty is qaraldy. Sottalýshylardyń úsheýi jappaı tártipsizdik bolǵan kezde 18 jasqa tolmaǵan edi.
Eske salaıyq, Sátbaev qalasyndaǵy oqıǵa byltyr 23 shilde túngi ýaqytta bolǵan edi. Aldymen joǵalyp ketken 5 jasar qyzdy búkil qala bolyp izdegen. Keıin kishkentaı qyz qaladaǵy páterlerdiń birinen tabyldy. Onyń janynda eresek er adam bolǵan. Kúdiktiniń ústinen «adam urlaý» jáne «kishkentaı balany zorlaý» babymen qylmystyq is qozǵaldy. Al qala turǵyndary bolsa polıeılerden kúdikti er adamdy berýdi talap etip, tártipsizdik jasady. Saldarynan úsh avtokólik órtenip, birnesheýine zaqym kelgen.
2020 jyldyń 6 qazanynda Qaraǵandy qalasynyń tergeý ızolıatorynda kúdiktiniń óli denesi tabyldy. Ol óz-ózine qol salǵan.
