Belgili bloger kóshede kezikken jandardyń kredıtin jaýyp berdi

2005
Adyrna.kz Telegram

Almatyda TikTok-bloger Nurbek Nurtaz qaıyrymdylyq jasady: ol kezdeısoq almatylyq turǵyndardyń nesıesin tólep berdi, dep habarlaıdy "Adyrna" ulttyq portaly Tengrinews.kz saıtyna silteme jasap. 

Blogerdiń vıdeosy Instagram-da myńdaǵan qaralym jınady. Oqyrmandardyń sózinshe, olar vıdeony kórgende kózderine jas alǵan. Sebebi "adamdardyń shynaıy sezimi ekrannyń ar jaǵynan da baıqalǵan" eken.

Nurbek Nurtazdyń sózinshe, adamdardyń nesıesin tólep berý týraly ıdeıa aıaq asty kelip iske asqan.

"Biz qaıyrymdylyqpen jıi aınalysyp turamyz, biraq ony únemi kórsete bermeımiz. Kez kelgen adamǵa jaqsylyq jasaýymyz múmkin, ol jaı kóshede ketip bara jatqan adam, múgedek nemese "jekege" kómek surap jazǵan adam bolýy múmkin. Eger adam shynymen qınalyp tursa, kómektesýge tyrysamyn. Ásirese qasıetti aıda nege jasamasqa? Onyń ústine múmkindigiń bolyp tursa. Meniń bul oıymdy áıelim men otbasym qoldady", - deıdi bloger.

Nurbek kóp turǵyn oǵan senbeı, aınalyp ketkenin aıtady.

"Úsh adamnyń nesıesin jaýyp berdik. Biraq biz qarjylaı kómektesken kóp adam kadrda joq. Mysaly bir ájeıden gúl satyp aldyq. Kóp emes, 10-20 myń teńgege. Men qaıyr tileıtinderdi onsha unatpaımyn, odan óz eńbegimen aqsha tabýǵa tyrysyp júrgen adamdardy qurmetteımin. Olar kitap, gúl satyp turady. Sondaı adamdarǵa kómektesýge tyrysamyn", - deıdi bloger.

Bloger bul jolǵy qaıyrymdylyqqa bir mıllıon teńgeden asa qarjysyn jumsaǵan. Bul kúni qarjylaı kómek shamamen on adamǵa jasalǵan.

"Bastapqyda belgili bıýdjet boldy. Bul kúni bir mıllıon teńgeden asa jumsadyq. Aldyn ala esepteýge tyrystyq. Al vıdeo túsirgen kezde úlken adamdarǵa kómektesýge tyrystyq. Vıdeodaǵy kúzetshi meni ózi tanydy. Onyń áıeli meniń oqyrmanym eken. Onyń 463 myń teńge nesıesi bolǵan, biz 300 myńyn tólep berdik", - deıdi Nurbek.

Pikirler