Dáýir ótip barady,
Alashymdy aldaǵan.
Sáýir ketip barady,
Aqyndardy jalmaǵan.
Aı, sáýir aı, sáýir aı,
Jerdiń tońyn jibitken –
Aı ishinde táýir aı.
Táýirligiń qaıyssy –
Jerime kózin alartyp,
Qara júzin qabartyp,
Saıasat kárin boratyp,
Irgeme keldi káýir-aı.
Aıtyp aıtpaı ne kerek,
Jaqsylardy jalmaǵan
Bolyp tursyń aýyr aı.
Qara sózdiń aqyny,
Qabdesh aǵam nar edi.
Qus bitkenniń jaqyny
Es aǵam shyrqaý jar edi.
Jaıyrynyń baq úni
Járken sháıir jampozym,
Aqyndyqtyń ary edi.
Alashymnyń ishinde,
Sózden saraı saldyrǵan,
Saldyryp tań qaldyrǵan,
Ózegin ottaı qarǵyzyp,
Jurtynyń ishin jandyrǵan,
Osylarym bar edi,
Jazba háldiń jarysy –
Qalam alamanynan,
Ozyp shyqqan dara edi.
Osyndaı dúrler syımaǵan,.
Dúnıe netken tar edi,
Qalaı endi aıtaıyn,
Qaıǵymdy qaıtip jaıqaıyn?
Tógilip ketti qaıteın,
Dilime kelgen zar edi...
Erlan TÓLEÝTAI
