Qaraǧandy oblysynyŋ Toǧyzqūdyq auylynda 8 ai būryn küieuı öltırıp, tyǧyp tastaǧan 35 jastaǧy kelınşektıŋ denesı tabyldy. Ony polisiia auyldan nebärı 10 şaqyrym jerden anyqtaǧan.
Marqūmnyŋ tuystary Būqar jyrau audandyq polisiia basqarmasyn qylmyskerdı der kezınde ūstamady dep kınälaidy.
Joǧalyp ketken kelınşektı ızdeuge atsalysqan auyl adamdary men marqūmnyŋ jaqyndary köp jinalǧandyqtan ol jerge arnaiy jasaq şaqyruǧa tura kelgen, dep habarlaidy «Adyrna» ūlttyq portaly «Astana» arnasyna sılteme jasap.
Aita keteiık, marqūm ötken jyly 22 qyrküiek künı Temırtau qalasynan Toǧyzqūdyq auylynda tūratyn küieuı men ata- enesınıŋ üiındegı kışkentai qyzyn alyp kelu üşın ketıp, sol küiı oralmaǧan. Sol künnıŋ ertesıne küieuı onyŋ törkınıne baryp, qyzdarynyŋ joǧalyp ketkenın habarlaidy. Kelınşek otbasylyq kikıljıŋ saldarynan soŋǧy jarty jylda öz ata-anasynyŋ üiınde tūrǧan körınedı.
Jaqyndary ız-tüzsız ketken äieldı polisiiamen bırge ızdegen. Polisiianyŋ aituynşa, küieuı 4 ai būryn äielın öltırgenın moiyndaǧan, artynşa özıne qol jūmsaǧan. Al marqūmnyŋ tuystary bolsa, «mäiıttıŋ sol mezette tabylmauyna polisiianyŋ salǧyrttyǧy sebep boldy» deidı. Onyŋ üstıne küdıktı qylmysyn moiyndar aldynda 3 balasynan bas tartyp, özınıŋ äpkesınıŋ atyna jazdyryp ketken. Naǧaşylary endı jienderın de köre almai otyr.
«2020 jyly 15 jeltoqsanda Jamanbaev Saiat Būqar jyrau audandyq polisiia basqarmasyna kelıp qylmysyn tolyq moiyndady. Qylmysyn moiyndap tūrǧan adamdy taŋǧy 8-de kelıp, kömgen jerıŋdı körset dep üiıne qaitaryp jıbergen. Osy qylmys 7 ai emes 7 saǧatta aşylatyn qylmys. Būqar jyrau audandyq zaŋ qyzmetkerlerı özderınıŋ jūmysyn adal atqarǧan joq dep esepteimız», - deidı marqūmnyŋ äpkesı Sairan Balbiqyzy.Qaraǧandy oblystyq PD resmi ökılı Baqytjan Qūdiiarovtyŋ aituynşa, 15 jeltoqsanda jauap alu kezınde ol äielın öltırgenın moiyndaǧan. Bıraq qyzmetkerlerde ony qamauǧa aluǧa naqty negız jäne dälel bolmapty.
«Onyŋ sözın rastaityn mäiıt te, kuägerler de bolǧan joq. Äieldıŋ mäiıtı tabyldy. Tiıstı saraptamalar taǧaiyndaldy. Qorytyndysy boiynşa prosessualdyq şeşım qabyldanady», - dep tüsındırdı ol.
