Kıno jáne teatr aktrısasy, QR eńbek sińirgen ártisi Ǵazıza Ábdinábıeva ómirden ótti dep habarlaıdy «Adyrna» ulttyq portaly.
Bul týraly Nur-Sultan qalasyndaǵy Mýzykalyq jas kórermender teatrynyń dırektory Ashat Maemırov Facebook-paraqshasynda habarlady.
«ǴAZIZA APA…. Apa-oý, egilttińiz ǵoı, jylattyńyz ǵoı dúıim eldi…. Qazaq teatry men kıno óneriniń maqtanyshyna aınalǵan Ǵazıza Ábdinábıeva dúnıeden ótti. Aty jaman tajal aýrý eshkimdi aıamady. Jarty ǵasyr boıy qazaq teatrynyń tórinde shynaıylyǵymen, tabıǵı talantymen kórermenin tamsandyrǵan Qazaqstannyń eńbek sińirgen artısi, «Parasat», «Qurmet» ordenderiniń ıegeri Ǵazıza Ábdinábıeva – jany men júregi meıirimge toly, adaldyqty tý etken bolmysy bólek jan edi…. Sahna keńistiginde Mórjandaı asyl analardyń, Arý qyzdardyń beınesin somdaǵan asa talantty aktrısa, aıaýly jan dúnıeden ótti. Kókirekti kerneıtin ókinish… Ǵazıza Apa, asyl apam-aı…» dep jazdy Maemırov.
