Ramazan qarsańynda Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly qazaqstandyqtarǵa úndeý jasady.
Qurmetti jamaǵat!
Ókinishke qaraı, bıyl da qasıetti Ramazan aıyn pandemııa jaǵdaıynda ótkizgeli otyrmyz. Juqpaly dertti oqshaýlaný, saqtaný arqyly ǵana jeńýge bolatynyn anyq ańǵardyq. Osy rette sizderdi aýyzashar kezinde, qulshylyq sátterinde sanıtarlyq talaptardy qatań saqtaýǵa shaqyramyn. Densaýlyq – bárinen qymbat qundylyq, Allanyń adamzatqa bergen amanaty. Osy oraıda jasy alpystan asqan aǵa-apalarymdy aýyz bekitýden buryn medıınalyq tekserýden ótip, dárigerdiń tıisti keńesin alýǵa shaqyramyn. Egde jastaǵy jáne balıǵatqa tolmaǵan azamattardan kúrdeli ahýal turaqtalǵansha meshitke barmaı, qulshylyqty úıde oryndaýyn suraımyz. Qazaqstan musylmandary dinı basqarmasy Ramazan aıynda aıtylatyn ýaǵyz-nasıhat, suraq-jaýap jumystaryn onlaın rejımde júrgizýdi jalǵastyrady. Quran hatym jasaý rásimderi de qashyqtan oqylady. Internet jelisi arqyly suraqqa jaýap alyp, onlaın nasıhat tyńdap, úıden shyqpaı saýapty amaldarǵa ortaqtasýǵa bolady. Biz qazirgi jaǵdaıdy eskerip, ótken jyly júzege asyrǵan jobamyz boıynsha pitir sadaqasy men zeketti onlaın rejımde berýdiń ońtaıly jolyn taǵy usynyp otyrmyz.
Qadirli qaýym!
Sizderdi pandemııa kezinde barynsha saqtanyp júrýge, adam kóp shoǵyrlanǵan oryndarǵa barmaýǵa, aýyz bekitken jaǵdaıda durys tamaqtanýǵa, múmkindiginshe jumys kestesin yńǵaılap, densaýlyqty kútýge úndeımin. Qasıetti aıda qaıyrymdylyq jasap, saýap alýdy nıet etken jandarǵa aıtarym: aýyzashar qoraptaryn eriktiler nemese meshit qyzmetkerleri arqyly kómekke muqtaj azamattarǵa jetkizýge bolatynyn qaperlerińizge salamyn. Dinı basqarma Ramazan aıynda sanıtarlyq talaptardy saqtaı otyryryp, qaıyrymdylyq is-sharalaryn josparly túrde júzege asyrady. Barshańyzdy ıgi iske úles qosýǵa shaqyramyn.
Qurmetti baýyrlar!
Ramazan – Rabbymyzdyń meırim-mahabbatyna bólenetin aı. Endeshe, berekeli aıdyń bereketinen qur qalmaıyq, halaıyq. Ardaqty Paıǵambarymyz Muhammed (oǵan Allanyń salaýaty men sálemi bolsyn): «Kimde kim baýyrynyń qajetin ótese, Alla onyń qajetinde bolady. Kimde kim musylmannyń bir qaıǵysyn seıiltse, Alla onyń qaıǵy-qasiretteriniń birin seıiltedi», – degen. Alla Taǵala nıetimiz ben amalymyzdy qabyl etip, barshamyzdy Ramazannan Ramazanǵa deıin aıdan aman, jyldan esen jetkize bergeı! Jaratýshy Iemiz jer betinen juqpaly indetti joıyp, jurtymyzǵa jar bolǵaı, elimizdi aman, jerimizdi tynysh etkeı! Ámın!
