Erdoǵan Reseı men Ýkraına arasyndaǵy kıkiljiń Mınsk kelisimi arqyly sheshilýi kerek dedi. Biraq Erdoǵan Ýkraınany qoldap otyrǵanyn ashyq aıtty. Osynyń aldyndaǵy Ýkraınanyń Germanııa tarapynan kútkeni Túrkııa tarapynan oryndalǵan sııaqty boldy. Túrkııa tarapy soǵys kezinde Ýkraınamen saýda-ekonomıkalyq qarym-qatynasty arttyratynyn atap ótti.
Búgin Donbassta Ýkraınanyń Túrkııadan satyp alǵan Bayraktar TB2 drondary shekara mańyn baqylap, kókte áýeletti. Reseıdiń áskerı qurylymdary bul kórinisti kórip, biraz abyrjyp qaldy. Sebebi, Bayraktar TB2 Reseıdiń PVO Panır-S, S-125, ZRK-Tor, tankteri men soǵys tehnıkalary shoǵyrlanyp turǵan terrıtorııanyń ústinen ushyp ótken. Bul jaıynda Ýkraınanyń qorǵanys jáne barlaý, ulttyq qaýipsizdik komıteti tóraǵasynyń orynbasary Iýrıı Mysıagın málim etti.
Iýrıı Mysıagın óziniń sózinde: "Ýkraına qarýly kúshteriniń sarbazdary, joldastar! Biz eshkimnen qoryqpaımyz! Biz olardy Máskeýine qarata shegindiremiz! Bizge Bayraktar TB2 solaı jasaýǵa múmkindik beredi" dep jigerlene sóıledi.
Ókinishke qaraı, búgin Donbassta jarylǵysh zat jarylyp, onyń jaryqshaǵynan 4 jasar búldirshin bala qaza tapty. Bul habar BUU-nyń bas shtaby men onyń qaýipsizdik keńesine de jetti. Qazir Donbasstyń áýe keńistigin Túrkııanyń Bayraktar TB2-si men AQSh-tyń RQ-4 Global Hawk atty drondary baqylaýǵa alyp, shekara tustarynda barlaý jumystaryna kiristi.
Reseı tarapynan qarýlanǵan separatıstter Ýkraınanyń ońtústik-shyǵys shekarasy mańynda iske kirisip, arandatýshy áreketterdi júrgizip jatyr. Osylaı túbi soǵysqa ulasatyn sııaqty. Vladımır Zelenskııdiń moınynda aýyr júk pen otan aldyndaǵy uly jaýapkershilik tur.
Bekbolat QARJAN,
"Adyrna" ulttyq portaly
