Kovıdke baılanysty bılikti sotqa berdi

1738
Adyrna.kz Telegram

Qaraǵandyda koronavırýsqa baılanysty shekteýdiń kúsheıýine baılanysty birneshe turǵyn sotqa azamattyq shaǵym túsirdi dep habarlaıdy «Adyrna» ulttyq portaly Azattyqqa silteme jasap.

Shaǵym ıeleri oblystyń bas sanıtar dárigeri Iýrıı Zalygın qol qoıǵan karantındi kúsheıtý týraly qaýlynyń kúshin joıýdy jáne shekteý sharalaryn zańsyz dep tanýdy surap otyr. Shaǵymda shekteý sharalary "qoǵamdy shoshytyp", "psıhologııalyq qysym retinde baǵalanyp otyr" dep kórsetilgen.

— Shekteý sharalaryna qarsymyn. Qoǵamdaǵy kóńil-kúı ózgerip, ásirese Naýryz aldynda bizdiń bárimizdi jaýyp tastap, jekelegen tulǵalar pen bastama toptary paıda bolǵan shaqta shaǵym túsirý týraly oı keldi. Jaýapkerdiń mekenjaıy boıynsha segiz shaǵym ázirlendi. Beseýi sotqa túsirildi, taǵy túsiretinder bar, – dedi Azattyqqa shaǵymdanýshylardyń biri, zańger Irına Fýrsova.

Onyń sózine qaraǵanda, karantındi kúsheıtý týraly qaýly azamattardyń erkin júrip-turý quqyǵy, tutynýshynyń tutyný quqyǵy, eńbek etý quqyǵy, balanyń bilim alý quqyǵyn buzǵan. Sottar onlaın-rejımde ótkendikten azamattardyń sotpen qorǵalý quqyǵy da shektelgen.

Turǵyndar shaǵymda shekteý sharalary bul "bıliktiń dıversııa men satqyndyǵyn búrkeý úshin Qazaqstan halqy aldynda qoıǵan spektakli" dep jazǵan. Olar indettiń kelgenine bir jyldan astam ýaqyt ótse de jáne turǵyndar karantın talaptaryn qatań saqtap, úıde otyrsa da, densaýlyq saqtaý salasyndaǵy sheneýnikter ınfekııany tejeı almady, adamdardyń qalypty ómirge oralýy úshin qajetti dárejede kúrespedi dep sanaıdy.

Azattyq tilshisi Qaraǵandy oblysynyń sanıtarlyq-epıdemıologııalyq qadaǵalaý departamentine habarlasyp kórdi. Biraq olar "árbir azamattyń shaǵym berýge quqyǵy bar" dep túsinikteme berýden bas tartty.

Qazbek aýdandyq soty bas sanıtar dárigerdiń qaýlysyn zańsyz dep tanýdy talap etken bes shaǵymnyń túskenin rastady. Bireýi óndiriske qabyldanǵan, bireýi shaǵym ıesine qaıtarylǵan, qalǵandary qarastyrylyp jatyr.

Naýryz aıynda Qaraǵandy oblysy koronavırýs boıynsha "qyzyl aımaqta" turǵan kezde oblys ortylyǵy men birqatar eldi mekenderde shekteý sharalary kúsheıgen. Sheneýnikter naýqastardyń kóbeıýin Naýryz merekesin birigip toılaýmen baılanystyrǵan.

Elde indet bastalǵaly beri 256 myńnan astam adamnyń koronavırýs testi oń shyqqan. 3129 adam koronavırýstan qaıtys bolǵan. Kóptegen sarapshylar naýqastardyń shynaıy sany resmı kórsetkishten áldeqaıda kóp dep sanaıdy.

Elde tez juǵatyn shtamdar tarap jatqan shaqta densaýlyq saqtaý mınıstrligi sáýir aıynyń basynda "realıstik senarıı" boıynsha aldaǵy úsh aıda taǵy 250 myń naýqas tirkeledi, 127 myńy aýrýhanaǵa jatady dep boljaǵan.

Pikirler