Qaraǵandy oblysynyń atyshýly Shahan kentinde qazandyq daýy biter emes. Turǵyndar jylý ortalyǵy endi iske qosylady-aý degende, onyń aqysyn qaltalary kótermeıtinin bilgen. Ár páterge jylý jetkizý úshin merdigerler 200 myńnan 500 myń teńgege deıin suraǵan. Al qarapaıym halyq bul somany qaıdan tabaryn bilmeıdi, dep habarlaıdy Astana telearnasy.
Alpysty alqymdaǵan Iýrıı Alkın 30 jyl shahtada jumys istegen. Jyldar boıy pesh jaǵyp, baspanasyn jylytyp júr. Qazandyq salynyp, oǵan qosylamyz dep júrgende, ortalyqtan taraǵan jylýdy baspanasyna tartý úshin 500 myń teńge tóleýi kerek ekenin bilgen. Zeınetker qomaqty qarjyny qaıdan alaryn bilmeıdi.
"500 myń teńgeni taýyp bere almaıtynym anyq. Alatynym 90 myń. Men ómir boıy óz kúshime ǵana sengen adammyn. Sonshama aqshany jınaý men úshin múmkin emes", – deıdi Shahan kentiniń turǵyny.
Osylaısha qazandyq salynǵanymen onyń jylýy qoljetimsiz ekenin bilgen jurttyń bılikke ókpesi qara qazandaı. Buǵan deıin sheneýnikter ár páterge jylý tartý úshin 200 myń teńgeden 500 júz myń teńgege deıin aqsha tóleıtinderin aıtqan. Shahandyqtar bul somany halyqtyń qaltasy kótermeıtinin alǵa tartady.
"235 myńnan 500 myńǵa deıin degen ne sumdyq. Bárinde 4-5 baladan bar. Endi ne isteıik? Úkimet qaıda qarap otyr? Turǵyndardyń jartysy tóleı almaıdy", – jergilikti turǵyn Aqmaral Ahmetova.
Bılik ókilderiniń aıtýynsha, aty shýly qazandyq 2 mlrd teńgedeı qarajatqa salynǵan. Kenttegi 11 áleýmettik nysan oǵan tegin qosylady. Al qalǵan júzge jýyq úı turǵyndary ortalyq qazandyqtan jylýdy óz kúshimen tartyp alýy tıis. Bul shyǵyndy úkimet kótere almaıdy.
"Úkimet óz aqshasyna úıdiń ishine istep bere almaıdy. Mine, qazandyq salyp, jylý jelisin tartyp jatyr. Bári daıyn bolǵanda úıine deıin kirgizip, qosyp beremiz. Iaǵnı, qosyp berý aqshasy sonsha shyqty. Sonymen qatar, demeýshiler de izdep jatyrmyz. Rasynda da qıyn jaǵdaıdaǵy otbasylarǵa kómektesemiz", – deıdi kent ákimi Ǵalym Ómirbekov.
