Ekpe ektirse oraza buzyla ma? Bul týraly «Fátaýa Hındııa» kitabynda «Teridegi usaq tesikter arqyly maı sekildi zattyń ishke kirýi orazany buzbaıdy» delingen, dep málimdedi QMDB baspasóz qyzmeti.
«Qazirgi zaman ǵalymdary ekpe arqyly salynatyn dárilerdi as-sý sııaqty denege azyq, qýat bolatyn jáne emdelý úshin (denege qýat, azyq bolmaıtyn) etip, ekige bólip qarastyrady. Olar: «Teri astyna jáne bulshyq etke emdelý úshin (denege qýat, azyq bolmaıtyn) ıne salsa, aýyz ashylmaıdy», – dep aıtady.
Biraq kók tamyrǵa ekpe salý (qan quıýdan basqa) máselesinde ǵalymdardyń kózqarasy ártúrli.
Ǵalymdardyń kóbi «Tamyrǵa salynatyn ıne denege qýat, azyq bolmasa, oraza buzylmaıdy» deıdi», - delingen habarlamada.
Ekpe – bakterııa, vırýs sekildi mıkroorganızmderden alynyp, adam organızmine juqpaly aýrýlardan aldyn ala saqtaný jáne olardyń ımmýndyq qasıetin arttyrý úshin egiletin preparat. Ol qajetti azyq nemese organızmge qýat beretin dárýmen emes. Sondyqtan adam denesine (teri astyna, bulshyq etke, jambasqa, kók tamyrǵa) ınemen ekpe egý orazany buzbaıdy.
"Adyrna" ulttyq portaly
