Jetisaı aýdany Qyzylqum eldi mekeniniń turǵyny Araılym Qurshanbek 11 jasynan bastap traktor aıdaıdy. 18 jastaǵy boıjetken keıingi úsh jylda qyzyǵýshylyǵyn kásipke aınaldyryp, aqsha taýyp júr. Sputnik Qazaqstan tilshisine bergen suqbatynda Araılym otbasylyq kásip pen traktor aıdaýǵa degen qyzyǵýshylyǵy týraly aıtyp berdi.
"11 jasymda rólge otyrdym. Janymda ákem otyratyn. Ákem qaıda barsa da erip baratynmyn. Keıin maǵan traktor aıdaýdy úıretińiz dedim. Muny otbasylyq kásip dep aıtýǵa bolady. Odan bólek jerimiz bar, jazdaı qaýyn egemiz", - deıdi Araılym.
Araılymnyń ózinen úlken eki aǵasy bar. Alaıda ishinde qyz balanyń qyzyǵýshylyǵy erekshe bolǵan.
"Ákem qazir jumysta. Qazir aǵam ekeýmiz traktordy kezektesip aıdaımyz. Óz jerimizdi aıdaý qajet bolsa, ony da isteımiz. Klıent kelse, oǵan da baramyz. Meniń tarktorymnyń markasy MTZ-80.1, oǵan soqa ilmeımin. Soqa ilip kúnine 10 gektar jer jyrtý meniń traktoryma qıyn bolady. Qazir "ol múmkin emes, ótirik" degen áńgime bolyp jatyr eken. Soqadan bólek saımandy ilip, oılanbaı aıdaı alamyn", - deıdi boıjetken.
Onyń aıtýynsha, jer jyrtatyn traktor izdep basqa da aýyl-aımaqtan keletinder bar. Klıenttermen qyzmet baǵasy boıynsha ákesi kelisedi.
"Klıenttemen ákem sóılesedi. Er adamdardyń áńgimesine aralaspaımyn. Sondaı sátte ákeme "ózińiz istep berseńizshi" dep aıtady. Maǵan senbeıtinder bar. Ákem sonda: "meniń qolym bos emes, osy qyz barady. Qalamasań basqaǵa bara ber" dep aıtady. Senbestik bolady. Biraq ol kóńilime tımeıdi", - deıdi Araılym.
Boıjetken úsh jyldan beri jeke jumys istep, aqsha tabady.
"Tabys kólemi klıenttiń jer kólemine baılanysty. Bir gektar jerdi kem degende 3 myń teńgeden jyrtyp beretin bolsam, 10 gektar jer 30 myń teńge bolady. Alaıda 2-3 gektar jerdi 4 myń teńgeden jyrtyp bersek, aýmaǵy úlkeıgen saıyn baǵasy arzandaıdy", - deıdi boıjetken.
Araılym qazir Túrkistan qalasynda tis dárigeri mamandyǵy boıynsha 1-kýrs stýdenti. Eldegi jaǵdaıǵa baılanysty onlaın oqyp jatyr. Al jer jyrtý naýqany kóktemde bastalady. Aıtýynsha, keıde traktor ishinde otyryp onlaın sabaqqa qatysady.
"Traktor ishinde otyryp sabaqqa qatysatyn kezder bolady. Shynymdy aıtsam, sondaı sátte basqa amal qalmaıdy. Sebebi eki jaqqa da kerekpin. Biraq jumystan keıin keshke úı jumysyn oryndap, sabaqty qaıtalaımyn", - deıdi ol.
Ol bastapqyda qolynan keletin isti kópshilikke kórsetkenine uıalǵan.
"Basynda muny elge kórsetýge uıalatynmyn. Ózimizdiń jerdi aıdap júre bereıin dep oıladym. Keıinnen áleýmettik jelige sýret júkteı beremin dep sheshtim. Bir jaǵy bolashaqqa estelik bolǵanyn qaladym. Elge shyǵyp, tanymal bolyp ketemin, adamdar oqyp, telearna kelip túsiredi degen oı bolmady. Jelige júkteı berdim. Bul jumysymnan uıalmaımyn, namystanbaımyn", - deıdi Araılym.
Onyń sózinshe, qyzyǵýshylyǵy men tańdaýy osy iske túskendikten, istep júrgen jumysyn maqtan tutady. Qyz bala bul isti amaly bolmaı istese, uıalady. Qyzyǵýshylyq bolmasa qıyn, dep túıindedi ol.
