Qurttaǵan kúrish, irigen sút! Kepildendirilgen áleýmettik paket alyp júrgen kórermen azyq-túliktiń sapasyna kóńili tolmaıtynyn aıtyp, bizdiń arnaǵa habarlasty. Onyń sózinshe, aı saıynǵy beriletin azyq-túlik sebetin balalarǵa berý múmkin emes. Sebebi qoraptaryn tyshqan tesse, botqalarynyń merzimi ótip ketken. Jalpy azyq-túlik sebetine qashan ózgeris engiziledi? Mamandar qandaı ýáj aıtýda? Bul týraly "Adyrna" ulttyq portaly Eýrazııa birinshi arnasyna silteme jasap habarlaıdy.
Qyzylordalyq Merýert Aıtımova ataýly áleýmettik kómek alyp júrgenderdiń qatarynda. Eki balasyna turaqty túrde azyq-túlik sebetimen qamtamasyz etiledi. Alaıda, kómektiń bul túrine kóńili tolmaıdy. Sebebi, áleýmettik qoraptyń ishindegi kúrish, botqalar, ózge de taýarlardyń sapasy syn kótermeıdi. Al sońǵy kelgen kúrishtiń ishinen tipti qurt shyqqan.
Merýert AITIMOVA, qala turǵyny:
Ózderińizge kórsetkendeı kúrishtiń teń jartysy qurt. Berilgen zattar qunarsyz. Ony bala jemeıdi. Jazbasha túrde usynys tastadyq aýyzsha da aıtyp jatyrmyz, so pakettiń quramyn aýystarsa, biz ózimiz baramyz ǵoı qol qoıýǵa, aıaqasty bolyp jatady».
Saqtaý merzimi ótip ketken botqalar, tyshqan jep ketken qoraptar, ashyǵan sút. Ózge óńir turǵyndary da sebettiń ishindegi taýarlar jeýge jaramsyz ekenin aıtyp shaǵymdanýda. Tipti jaramsyzdaryn maly bar úılerge berip qutylamyz deıdi.
Eńbek mınıstrligi mundaı problemalar bar ekenin joqqa shyǵarmaıdy. Degenmen, jaramsyz taýarlardy kórgen jaǵdaıda jumyspen qamtý ortalyǵyna aparyp, almastyryp alý kerek. Eń bolmasa 1411 telefon nómirine habarlasyp, túsindirgen durys deıdi.
Nursáýle ELEÝOVA, áleýmettik kómek saıasatynyń damytý departamentiniń bas sarapshysy:
Árıne ondaı problemalar bolýy múmkin. Negizi jergilikti atqarýshy org, jumyspen qamtý ortalyqtar aınalsady. ASP alýshy 1411 habarlasýǵa bolady, tikeleı jumyspen qamtý ortalyǵyna habaralasa alady. Olar problemany sheshýge mindetti. Ónim bildirýshilerden bolyp otyr».
Qoǵam belsendisi Baıan Ismaılova azyq-túlik sebetine qatysty qordalanyp qalǵan másele jetkilikti. Sondyqtan mınıstrlik kómek alýshylarǵa qorappen bergennen góri, ózderine tańdaý múmkindigin berse degen pikirde. Solardyń biri áleýmettik karta.
Baıan ISMAILOVA, qoǵam belsendisi:
Imenno mankadan qurt shyǵyp tur, sútteri irip jatyr. Kóńilinen shyǵyp jatqan joq, kerek tamaǵyn ala almaıdy. Kerek nárseleri joq, kartoshka, morkov, bári odno ı toje».
Odan bólek úsh aıdan beri azyq-túlik sebetine qol jetkize almaı jatqandar jeterlik. Osylaısha, mınıstrlik naýryz aıynyń sońyna deıin áleýmettik qorap barlyq otbasyǵa jetkiziletinin málimdedi
Nursáýle ELEÝOVA, áleýmettik kómek saıasatynyń damytý departamentiniń bas sarapshysy:
«ASP alýshylar kepildendirlgen berilip jatyr. Taratylyp qańtar-aqpan aılary úshin, óńirler bar tolyq taratylady. Qoldanystaǵy zańnamaǵa sáıkes KÁP toqsanynan bir ret taratylady».
Belgilisi, jyldyń sońynda kepildendirilgen áleýmettik paketke biraqatar ózgerister engizilýi múmkin. Atap aıtqanda, kómek alýshylar arnaıy áleýmettik portal arqyly azyq-túlik túrin ózi tańdap, kóńilinen shyqqan taýarǵa qol jetkize alady.