Almaty oblysynda turatyn retro kólik jınaýshy Meıirhan Káribaev eski tehnıkalardy saqtaýǵa qaltasy kótermeıtinin aıtady, dep habarlaıdy «Habar 24».
Keıbiriniń zaýyttan shyqqanyna bir ǵasyrǵa jýyqtaǵan kólikter qazir shań basyp tur. Qazaqtyń tarıhı týyndylarynda taqymdalǵan tehnıkalardyń búgingi hali týraly tilshi tarqatady.
Arshyn Kemeljan, tilshi:
- Almaty oblysynyń Abaı aýylynda turatyn Meıirhan Káribaev jıyrma jyldan beri retro kólikterdi jınaýmen aınalysady. Búginde onyń aýlasynda ártúrli sanattaǵy 25 avtomobıl bar. Ishindegi eń eskisi 1936 jyly Italııada qurastyrylǵan «Fıat» mashınasy. Odan keıingisi 1942 jylǵy «Gaz-67» áskerı kóligi. Uly Otan soǵysynan aman qalǵan tehnıkany ardagerdiń otbasyn áreń kóndirip, 5 myń dollarǵa satyp alǵan. Bul tehnıka talaı ret soǵys týraly fılmderde paıdalanylǵan.
Meıirhan káribaev, retro kólik jınaýshy:
- Bul mashınany men 10 jyl júrip bir adamdardan satyp alǵam. Bul soǵysta tarıh boıynsha bir komandırdi qutqarǵan. Osyny syılyq retinde júrgizýshisine bergen. Ol shal nemeresine bergen. Men kınoǵa qoıamyn, qoldanamyz, halyq kórsin degennen keıin buny satty maǵan.
Munda «Gaz-01», «Gaz-51» júk kólikteri, Keńes Odaǵyndaǵy partııa hatshylary mingen «Zım» men «Volga» jáne odan basqa jeńil kólikter bar. Meıirhan Káribaevtyń retro kólikterin «Balalyq shaǵymnyń aspany», «Anaǵa aparar jol», «Balýan Sholaq» syndy tarıhı kınolardyń kóbinen kórýge bolady. Qazir shań basyp turǵanymen barlyǵy júriske jaramdy, deıdi. Ómiriniń jıyrma jylyn retro kólikter jınaýǵa arnaǵan Meıirhan Káribaev búginde jádigerlerdi saqtaýǵa aqshanyń qolbaılaý bolyp turǵanyn aıtady. Murajaı ashsam degen armany da qarajattyń tapshylyǵynan júzege aspaı tur. Onyń endigi bir maqsaty – qoldaýshylar taýyp, el Táýelsizdiginiń 30 jyldyǵyna arnalǵan retro kólikter sherýin uıymdastyrý.
Meıirhan Káribaev, retro kólik jınaýshy:
- Sońǵy ýaqytta sál qınalyp jatyrmyz, mashınany saqtaýda. Ony ári qaraı kórermiz, jaqsy bolmaı jatsa, kıno bolmaı jatsa, bulardyń barlyǵyn satý kerek, jiberý kerek.
Meıirhannyń ıeliginde 1945 jylǵy parovoz ben 6 vagony bar. Aýyr tehnıka tek túsirilim kezinde qoldanylady. Kollekııa jınaýshy otarbany Shyǵys Qazaqstan oblysyndaǵy Shemonaıha qalasynan, vagondaryn Qyzylordadan satyp alypty.
«Tarıhı murany saqtaýǵa Úkimetten qoldaý bolmasa, qara temir retinde satýdan basqa amal joq», - deıdi ol.
