Reseı Qazaqstanǵa qosymsha "Spýtnık V" vakınasynyń 4 mıllıon dozasyn jetkizedi, dep habarlaıdy Qazaqstan premer-mınıstriniń baspasóz qyzmeti.
Dúısenbi kúni Qazaqstan úkimetiniń basshysy Asqar Mamın Máskeýge jumys saparymen bardy. Ol Reseı premeri Mıhaıl Mıshýstınmen kelissóz júrgizdi.
Kezdesý barysynda COVID-19-dyń taralýyna qarsy kúres jáne eki eldiń ekonomıkasy úshin pandemııanyń saldaryn joıý jónindegi birlesken sharalarǵa erekshe nazar aýdaryldy.
"Spýtnık V" reseılik vakınasynyń 4 mıllıon dozasyn Qazaqstanǵa qosymsha jetkizý týraly ýaǵdalastyqqa qol jetkizildi", - delingen habarlamada.
"Vırýstyń taralýyn jeńý úshin bizdiń elderimizdiń kúsh-jigerin, onyń ishinde halyqty jappaı vakınalaý máselelerinde úılestirýdiń joǵary deńgeıi qajet", - dep keltirdi Asqar Mamınniń sózin baspasóz qyzmeti.
Úkimet basshylary, sonymen qatar, saýda-ekonomıkalyq, qarjy-ınvestıııalyq, energetıka jáne ǵarysh salalaryndaǵy Qazaqstan-Reseı yntymaqtastyǵyn odan ári arttyrý máselelerin talqylady. EAEO formatyndaǵy ózara is-qımyldyń ózekti máseleleri qaraldy.
Budan bólek, osy jyldyń ekinshi jartysynda Kókshetaýda ótetin "Ekologııa jáne jasyl ósim salasyndaǵy yntymaqtastyq" taqyrybyna arnalǵan XVII Aımaqaralyq yntymaqtastyq forýmyna daıyndyq máselesi talqylandy.
Aıta ketsek, Qazaqstanǵa 1 aqpan jappaı vakınalaý bastalardyń aldynda Reseıden "Spýtnık V" vakınasy birinshi komponentiniń 22 myń dozasy jetkizildi. Búginde preparat tolyǵymen paıdalanyldy.
