Memleket basshysy Qasym-Jomart Toqaev Qazaqstan halqyn Naýryz meıramymen quttyqtady, dep habarlady Aqorda.
"Tirshilikti túletip, tabıǵatqa jan bitiretin Naýryz – bizdiń tól jańa jylymyzdyń bastaýy, jańǵyrý men jańa ómirge umtylýdyń nyshany. Ejelgi jyl qaıyrý dástúri – halqymyzdyń tereń tanymy men taǵylymdy tarıhynyń kórinisi. Shýaqty kóktem merekesin búkil el bolyp asyǵa kútemiz. Biz taǵdyrymyzben sabaqtas áz-Naýryzdan ótken ǵasyrda eriksiz ajyrap qaldyq. Egemendiktiń eleń-alańynda ejelgi saltymyzben qaıta qaýyshtyq. Naýryzdyń kóne dástúrlerin nyǵaıtý úshin Elbasy bul merekeni memlekettik meıramǵa aınaldyrdy", - dedi prezıdent.
Toqaev jyl basynda jarııalanǵan "Táýelsizdik bárinen qymbat" atty maqalasynda Naýryzdy jańasha atap ótý qajettigine toqtalǵanyn eske saldy. Onyń pikirinshe, merekeniń ár sáti elge paıdasy tıetin, urpaqqa ónege bolatyn ıgilikti iske ulasýǵa tıis. Sondyqtan qazir barlyq aımaqta jas urpaq úshin tárbıelik máni zor kóptegen shara qolǵa alynýda. Munyń bárin Amal aıynan keıin de jalǵastyra berýge bolady.
"Ulystyń Uly kúnin toılaý qalalar men aýyldardyń aýqymdy alańdary men kórikti kóshelerinde ótetin birneshe saǵattyq is-sharamen ǵana shektelmeýi qajet. Naýryz – eń aldymen, taǵylymy mol otbasylyq meıram. Merekelik kóńil-kúı barlyq shańyraqta bolýy kerek. Jastar úlkenderge sálem berip, batasyn alsa, bir-birine aq tilekterin arnasa, qandaı jarasymdy?! Naýryz – aǵaıyndy baýyrmaldyqqa, kórshi-qolańdy tatýlyqqa shaqyratyn bereke-birliktiń merekesi. Bul týraly Uly Abaı "Qyrdaǵy el oıdaǵy elmen aralasyp, kúlimdesip, kórisip, qushaqtasyp" dep jyrlaǵan", - deıdi memleket basshysy.
Onyń aıtýynsha, meıramnyń tereń fılosofııalyq mazmuny jaqsylyqty eshqashan umytpaı, qaıyrymdylyqtyń qadirin bilýge jáne tabıǵatpen úndestikte ómir súrýge úndeıdi. El uǵymynda qyrdyń qyzǵaldaǵy – naǵyz kóktemniń nyshany. Osy oraıda, qyzǵaldaq gúlin Uly daladaǵy Ulystyń Uly kúniniń basty belgisi retinde bekitýge bolady.
"Qazir dúnıede geosaıası dúrbeleń beleń alyp, halyqaralyq tartystar shıelenise túsýde. Koronavırýs indeti órship, álem ekonomıkasyndaǵy daǵdarys kúsheıýde. Osyndaı kúrdeli kezeńde Qazaqstan halqy barlyq syn-qaterlerge tótep berý úshin birligin bekemdep, qaısarlyq tanytýy qajet. Bizdiń babalarymyz ejelden Ulystyń Uly kúni bir-birine kómektesip, qıyn kezeńde qolyndaǵy baryn bólisken. Osy ıgi dástúrdi halqymyz áli kúnge deıin berik ustanyp kele jatqany kóńil qýantady", - dep tolyqtyrdy Qasym-Jomart Toqaev.
Pandemııa kezinde ondaǵan myń dáriger men meıirbıke, tártip saqshylary men áskerı qyzmetshiler jáne eriktiler eldiń densaýlyǵyn saqtaý úshin aıanbaı eńbek etýde. Mıkrobıolog mamandarymyz az ýaqyttyń ishinde koronavırýsqa qarsy vakına jasap shyǵardy, dedi prezıdent.
"Azamattarymyzdyń naǵyz márttigi men shynaıy janashyrlyǵyn, zor jetistikterin áıgileıtin mysaldar óte kóp. Muny ózderińiz kórip-bilip júrsizder. Myzǵymas birliktiń, tatýlyq pen turaqtylyqtyń arqasynda eńsesi bıik el bolyp otyrmyz. Áz-Naýryz – izgilik pen qaıyrymdylyqtyń, meıirim men janashyrlyqtyń merekesi. Biz usynǵan ádiletti qoǵam jáne áleýmettik memleket qaǵıdasy osy qundylyqtarmen tolyq úndesedi. Sonymen birge, Naýryz – eldi eńbekke jumyldyryp, yrysymyzdy molaıtatyn meıram. Biz babalar jolymen bilek sybana jumys istep, Qazaqstandy básekelik qabileti zor, qýatty memleketke aınaldyramyz", - dep atap ótti ol.
Memleket basshysy bıyl Qazaqstan tarıhı meje – Táýelsizdiktiń 30 jyldyǵyn atap ótetinin eske saldy.
"Osy ýaqyttyń ishinde elimiz tolaǵaı tabysqa jetti. Biraq jetistikke marqaıyp, bosańsýǵa bolmaıdy. Biz memleketimizdi júıeli ózgeristerge jeteleıtin aýqymdy reformalardy jalǵastyra beremiz. Jan-jaqty jańǵyrý ultymyzdy órge bastap, Qazaqstannyń Máńgilik el bolýyna jol ashady. Bizdiń basty maqsatymyz – osy! Bosaǵamyzdan attaǵan Jańa jyl barshańyzǵa yrys-nesibe ákelsin dep tileımin!Ár shańyraqqa qydyr qonyp, qut darysyn! Ulystyń uly kúni qutty bolsyn!", - dep túıindedi Toqaev.
