Memleket basşysy Qasym-Jomart Toqaev Qazaqstan halqyn Nauryz meiramymen qūttyqtady, dep habarlady Aqorda.
"Tırşılıktı tületıp, tabiǧatqa jan bıtıretın Nauryz – bızdıŋ töl jaŋa jylymyzdyŋ bastauy, jaŋǧyru men jaŋa ömırge ūmtyludyŋ nyşany. Ejelgı jyl qaiyru dästürı – halqymyzdyŋ tereŋ tanymy men taǧylymdy tarihynyŋ körınısı. Şuaqty köktem merekesın bükıl el bolyp asyǧa kütemız. Bız taǧdyrymyzben sabaqtas äz-Nauryzdan ötken ǧasyrda erıksız ajyrap qaldyq. Egemendıktıŋ eleŋ-alaŋynda ejelgı saltymyzben qaita qauyştyq. Nauryzdyŋ köne dästürlerın nyǧaitu üşın Elbasy būl merekenı memlekettık meiramǧa ainaldyrdy", - dedı prezident.Toqaev jyl basynda jariialanǧan "Täuelsızdık bärınen qymbat" atty maqalasynda Nauryzdy jaŋaşa atap ötu qajettıgıne toqtalǧanyn eske saldy. Onyŋ pıkırınşe, merekenıŋ är sätı elge paidasy tietın, ūrpaqqa önege bolatyn igılıktı ıske ūlasuǧa tiıs. Sondyqtan qazır barlyq aimaqta jas ūrpaq üşın tärbielık mänı zor köptegen şara qolǧa alynuda. Mūnyŋ bärın Amal aiynan keiın de jalǧastyra beruge bolady. "Ūlystyŋ Ūly künın toilau qalalar men auyldardyŋ auqymdy alaŋdary men körıktı köşelerınde ötetın bırneşe saǧattyq ıs-şaramen ǧana şektelmeuı qajet. Nauryz – eŋ aldymen, taǧylymy mol otbasylyq meiram. Merekelık köŋıl-küi barlyq şaŋyraqta boluy kerek. Jastar ülkenderge sälem berıp, batasyn alsa, bır-bırıne aq tılekterın arnasa, qandai jarasymdy?! Nauryz – aǧaiyndy bauyrmaldyqqa, körşı-qolaŋdy tatulyqqa şaqyratyn bereke-bırlıktıŋ merekesı. Būl turaly Ūly Abai "Qyrdaǧy el oidaǧy elmen aralasyp, külımdesıp, körısıp, qūşaqtasyp" dep jyrlaǧan", - deidı memleket basşysy. Onyŋ aituynşa, meiramnyŋ tereŋ filosofiialyq mazmūny jaqsylyqty eşqaşan ūmytpai, qaiyrymdylyqtyŋ qadırın bıluge jäne tabiǧatpen ündestıkte ömır süruge ündeidı. El ūǧymynda qyrdyŋ qyzǧaldaǧy – naǧyz köktemnıŋ nyşany. Osy oraida, qyzǧaldaq gülın Ūly daladaǧy Ūlystyŋ Ūly künınıŋ basty belgısı retınde bekıtuge bolady.
"Qazır düniede geosaiasi dürbeleŋ beleŋ alyp, halyqaralyq tartystar şielenıse tüsude. Koronavirus ındetı örşıp, älem ekonomikasyndaǧy daǧdarys küşeiude. Osyndai kürdelı kezeŋde Qazaqstan halqy barlyq syn-qaterlerge tötep beru üşın bırlıgın bekemdep, qaisarlyq tanytuy qajet. Bızdıŋ babalarymyz ejelden Ūlystyŋ Ūly künı bır-bırıne kömektesıp, qiyn kezeŋde qolyndaǧy baryn bölısken. Osy igı dästürdı halqymyz älı künge deiın berık ūstanyp kele jatqany köŋıl quantady", - dep tolyqtyrdy Qasym-Jomart Toqaev.Pandemiia kezınde ondaǧan myŋ därıger men meiırbike, tärtıp saqşylary men äskeri qyzmetşıler jäne erıktıler eldıŋ densaulyǧyn saqtau üşın aianbai eŋbek etude. Mikrobiolog mamandarymyz az uaqyttyŋ ışınde koronavirusqa qarsy vaksina jasap şyǧardy, dedı prezident. "Azamattarymyzdyŋ naǧyz märttıgı men şynaiy janaşyrlyǧyn, zor jetıstıkterın äigıleitın mysaldar öte köp. Mūny özderıŋız körıp-bılıp jürsızder. Myzǧymas bırlıktıŋ, tatulyq pen tūraqtylyqtyŋ arqasynda eŋsesı biık el bolyp otyrmyz. Äz-Nauryz – ızgılık pen qaiyrymdylyqtyŋ, meiırım men janaşyrlyqtyŋ merekesı. Bız ūsynǧan ädılettı qoǧam jäne äleumettık memleket qaǧidasy osy qūndylyqtarmen tolyq ündesedı. Sonymen bırge, Nauryz – eldı eŋbekke jūmyldyryp, yrysymyzdy molaitatyn meiram. Bız babalar jolymen bılek sybana jūmys ıstep, Qazaqstandy bäsekelık qabıletı zor, quatty memleketke ainaldyramyz", - dep atap öttı ol. Memleket basşysy biyl Qazaqstan tarihi meje – Täuelsızdıktıŋ 30 jyldyǧyn atap ötetının eske saldy. "Osy uaqyttyŋ ışınde elımız tolaǧai tabysqa jettı. Bıraq jetıstıkke marqaiyp, bosaŋsuǧa bolmaidy. Bız memleketımızdı jüielı özgerısterge jeteleitın auqymdy reformalardy jalǧastyra beremız. Jan-jaqty jaŋǧyru ūltymyzdy örge bastap, Qazaqstannyŋ Mäŋgılık el boluyna jol aşady. Bızdıŋ basty maqsatymyz – osy! Bosaǧamyzdan attaǧan Jaŋa jyl barşaŋyzǧa yrys-nesıbe äkelsın dep tıleimın!Är şaŋyraqqa qydyr qonyp, qūt darysyn! Ūlystyŋ ūly künı qūtty bolsyn!", - dep tüiındedı Toqaev.
