Shyǵys Qazaqstan oblysynyń Glýbokoe aýdanynda 15 naýryz kúni eki bala gazdan ýlanyp qaldy, dep habarlaıdy ShQO Tótenshe jaǵdaılar departamentiniń baspasóz qyzmeti.
Sekısovka aýylynda turatyn 2006 jyly týǵan jasóspirim men 2013 jyly týǵan onyń ápkesi Ana men bala ortalyǵyna túsken.
Zardap shekkenderdiń anasy tańerteń peshti jaǵyp, jumysqa ketken.
Balalarmen birge úıde ájesi qalǵan. Túski astan keıin balalar aýyryp turǵandaryn aıtyp, anasyna habarlasqan.
Anasy dereý jedel járdem shaqyryp, balalar aýrýhanaǵa ortasha aýyr jaǵdaıda jatqyzyldy. Ájesi gazdan ýlanǵan joq.
ShQO TJD Órt sóndirý zertteý synaq zerthanasynyń qyzmetkerleri páterdegi jylytý peshiniń as úıde ornalasqanyn anyqtady. Balalar peshtiń jaramsyzdyǵynan jáne onyń tútindi durys tartpaýynan ýlanyp qaldy.
Mamandar arnaıy quraldyń kómegimen úıdegi kómirtegi totyǵynyń mólsherin ólshedi. Qaıǵyly jaǵdaıdyń aldyn alý úshin Glýbokoe aýdanynyń TJB mamandary tek jaramdy pesh jabdyqtaryn paıdalanyp, peshtiń qurylysyndaǵy jaryqtardy ýaqytynda jóndeýdi, murjany ýaqtyly tazalap turýdy eskertti.
«Tótenshe jaǵdaılar týyndaǵan jaǵdaıda «101» jáne «112» nómirlerine qońyraý shalyńyz», – delingen habarlamada.
