16 naýryz kúni Memleket basshysynyń tapsyrmasy boıynsha QR Premer-Mınıstriniń orynbasary Eraly Toǵjanov bastaǵan jumys toby Túrkistan oblysynyń shekara mańyndaǵy aýdandaryn aralady, dep habarlaıdy «Adyrna» ulttyq portaly QazAqparatqa silteme jasap.
Jumys sapary barysynda E. Toǵjanov Túrkistan oblysy Saryaǵash aýdanynyń Baǵys jáne Hııabon aýyldarynyń áleýmettik nysandarynyń jaǵdaıymen tanysyp, turǵyndarymen kezdesti. Vıe-premermen kezdesýde turǵyndar aýyldardyń ózekti máselelerin kóterdi, onyń ishinde múlik pen jer ýchaskelerin tirkeý múmkindiginiń joqtyǵyn aıtty. Aýyl turǵyndarynyń aıtýynsha, eginshilik pen mal sharýashylyǵyna arnalǵan jerler men sýdyń jetispeýshiligi ótkir másele bolyp otyrǵan kórinedi. Sonymen qatar aýyldarda gazdyń joqtyǵy baıqalady.
Kezdesý qorytyndysy boıynsha Premer-Mınıstrdiń orynbasary oblys ákimdigine turǵyndardyń kóterip otyrǵan máselelerin sheshý boıynsha barlyq qajetti sharalardy qabyldaýdy tapsyrdy. Osylaısha, osy jyldyń 1 sáýirine deıin aýyl sharýashylyǵy jerlerine olardyń sýmen qamtamasyz etilýin eskere otyryp túgendeý jumystarynyń júrgizilýi, aýyl turǵyndarynyń jer ýchaskeleri men turǵyn úılerin tirkeýdi 31 mamyrǵa deıin aıaqtaý, sondaı-aq 1 qyrkúıekke deıin Túrkistan oblysynyń 6 aýylyn gazben qamtamasyz etý tapsyryldy.
Eraly Toǵjanov atalǵan eldi mekenderdiń shekaralaryn aıqyndaýdyń mańyzdylyǵyn atap ótip, oblys basshylyǵyna bıylǵy 15 sáýirge deıin jergilikti halyqtyń qajettiligi úshin jaıylymdyq jerlerdi anyqtaý boıynsha tıisti jumystardyń júrgizilýin, al 20 sáýirge deıin aýyl shekarasyn túpkilikti bekitýdi tapsyrdy. Sonymen qatar Baǵys aýylynda apatty mekteptiń ornyna jańa ǵımarat salyp, ınternet sapasyn kóterý úshin «Kcell» jáne «Tele-2» jelilerin jańǵyrtyp, 3G/4G baılanysymen qamtý josparlanýda. Shekara mańyndaǵy aýyldardy damytý máseleleri Úkimettiń baqylaýynda.
