Alıaýtdınovtyń fanaty emespin. Dinı ýaǵyzdardy da tyńdap júrmin dep aıta almaımyn. Biraq Shámildiń myna bir sózinde jan bar. Tyńdap otyryp, jasóspirim kezim esime oraldy.
Endi er jetip kele jatqanda anda-munda barǵyń keledi (Shardarada baratyn jer bazar ǵana), barǵan soń, anaý-mynaýdy alǵyń keledi. Ákemnen aqsha suraımyn. Beredi. Biraq qaıda jumsaıtynyńdy surap beredi. Kózdi jumyp bere salmaıdy.
Suraýdyń astyna alyp aqsha bergen soń, ári-beriden soń aqsha da suraǵyń kelmeıdi.
Onyń ústine ákeń oıyn jasyrmaı jazatyn jýrnalıst bolǵan soń, ara-tura jumystan da birer jylǵa shyǵyp qalady. Onyń ústine úıde basy artyq aqsha da joq.
Egemendiktiń alǵashqy on jyldyǵynda er jettik. Aýyldaǵy jaǵdaı da ońyp turǵan joq. Sony bilip ósken soń, múlde aqsha suramaısyń. Tipti mektepti bitirgende túsetin vınetkaǵa 500 teńge jınaǵanda úıden aqsha suraýǵa namystanyp, mektepti vınetkasyz bitirdim.
Odan Almatyǵa attandym. Oqýǵa ketip bara jatqanda ákem marqum 5 myń teńge berdi. Sodan Almatyda jazda ofııant bolyp birer aı jumys istedim. Aýylda oqýshy kezimde mal baǵyp, baqtaǵy jemis-jıdekti bazarǵa aparyp satyp aqsha tapqanymdy eseptemegende daıashylyq - meniń alǵashqy jumysym boldy. Daıashy bolyp tapqan alǵashqy aılyǵyma yrymdap nan men aıran aldym.
Ózimnen eki jas úlken ápkem Gúlnár Muhanova Almatyǵa eki jyl buryn barǵan, QazUÝ-da oqıdy. Men barǵan jyly, úshinshi kýrsta oqyp júrip “Túrkistan” gazetine jumysqa turdy, odan “Habar” men “Azattyqta” qatar istedi. QazUÝ-diń 5-jataqhanasynda tegin turamyz. Ápkemniń aılyǵyn únemdesek, ekeýimizge jetedi.
Aqshany únemdeý úshin bazardan bir qap un, bir qap rojkı alyp kelem. Qamyr ılep, chýdo-pechkaǵa nan pisirem. Alǵash ret nan pisirgen kúnim áli esimde. Aýyldaǵy jeńgeme habarlasyp, tehnologııasyn surap aldym. Kóz kórip júrgen proess bolǵan soń, asa qıynǵa soqpady. Biraq nanym chýdo-pechkadan taqtaıdaı qatyp shyqty. Táptishtep taǵy surap aldym. Sóıtsem, ashytqyǵa ystyq sý emes, jyly sý quıý kerek eken.
Aýyldan toń maıǵa qýyrdaq qatyryp berip jiberedi. Ony skovorodkaǵa salyp, eritip, ústine sý quıyp, rojkı sala qoıasyń. Tórt jyl rojkı jegen soń ba, keıinnen biraz ýaqyt rojkıge qaraı almaı júrdim.
Sodan ne kerek, 18 jasyma jetpeı “Jas alash” gazetine jumysqa turdym. Sodan bastap ákemnen aqsha suraǵan emespin. 3-4 kýrstyń oqý aqysyn da ózim tóledim.
Sonda ishkeni aldynda, ishpegeni artynda bolǵan qurdastarymdy kórip, keıde nalıtynmyn. Keıinnen, aıaqtanǵan soń, tartynyp júrip er jetý bul bir sor emes, baq ekenin uqtym.
