Bókeıhanov Álıhan (1870-1937) - kórnekti qoǵam jáne memleket qaıratkeri, ǵulama ǵalym, ult azattyq qozǵalysynyń teorııalyq negizin salýshy ári kósemi, qazaqtyń tuńǵysh saıası partııasyn uıymdastyrýshy jáne Alashorda úkimetiniń tóraǵasy.
Týǵan jeri burynǵy Semeı oblysyndaǵy Qarqaraly ýeziniń Toqyraýyn bolysy, qazirgi Qaraǵandy oblysynyń Aqtoǵaı aýdany. Ata tegi Shyńǵys hannyń úlken uly Joshydan taraıtyn tóre tuqymy. Arǵy atasy ataqty Kókjal Baraq. Qazaqtyń sońǵy handarynyń biri Bókeı han osy Kókjal Baraqtyń balasy. Bókeıden Batyr, odan Myrzataı, odan Álıhannyń ákesi Nurmuhamed.
1866 jyly 5 naýryzda (óziniń tergeýde bergen jaýabynan) burynǵy Semeı oblysy, Qarqaraly ýezi, Toqyraýyn bolysynyń 7-aýylynda týǵan. Álekeńniń týǵan jyly týraly derekter ár túrli. Onyń jasy týraly keltirilgen eń alǵashqy arhıvtik derek QR ortalyq arhıvinde saqtalǵan qujatta Álekeńniń Qarqaraly erler prıhod ýchılıesiniń daıyndyq bóliminde 1878/79-jylynyń 1-shi jarty jyldyǵynda oqyp júrgen 23 qazaq balasymen birge oqý úlgerimi týraly vedomosindegi derekte, Álekeń ýchılıege 1878 jyly 16 qyrkúıekte túskende jasy 11-de dep kórsetilgen. Iaǵnı týǵan jyly 1867 bolmaq. Bul jyl Álekeńniń ózi kórsetken 1866 jylǵa jaqyn. Sondyqtan onyń 1866 jyly týǵany kúmán týǵyzbasa kerek.
