Májilis depýtaty Elnur Beısenbaev balalar quqyǵyn qorǵaý zańnamasyna "jábirleý" uǵymy ne úshin engizilip otyrǵanyn túsindirdi, dep habarlaıdy Sputnik Qazaqstan tilshisi.
"Barlyǵymyz talqylap otyrǵan balanyń quqyǵyn qorǵaý men ony qoldaýǵa baǵyttalǵan zańdarǵa ózgerister engizý boıynsha qoǵamda túsinispeýshilik týyndap otyr. Onyń basty sebebi – áleýmettik jelide jáne WhatsApp messendjerinde jalǵan aqparattyń taratylýy, dáıeksiz málimetterdiń halyq arasynda talqylanýy", - dedi Beısenbaev ortalyq kommýnıkaııalar qyzmetinde ótken onlaın brıfıngte.
Onyń aıtýynsha, kóptegen qoǵam belsendisi "jábirleý" degen túsinik qazaq dástúrine qarsy engizilip otyr dep sanaıdy.
-
"Olaı emes, kerisinshe, balany qadirleýge, ony syılaýǵa baǵyttalady. Bilim berý mekemelerindegi jábirleýdi boldyrmaý jáne oǵan jaýap berý úshin júıeli sharalar qabyldaýdyń mańyzdylyǵyn kórsetip otyr. Mysaly, ulttyq qoǵamdyq densaýlyq saqtaý ortalyǵynyń málimeti boıynsha elimizde oqýshylardyń 12 proentten astamy jábirlenýi múmkin. Bul – bir. Ekinshiden, ótken jyldyń ózinde 143 jasóspirim ózine qol jumsaǵan bolsa, 306 jasóspirim sondaı áreket jasaýǵa tyrysqan, ıaǵnı, álem boıynsha bizdiń elimiz balalar arasyndaǵy sýııdten aldyńǵy qatarlardyń birinde tur", - dep atap ótti Beısenbaev.
Depýtattyń sózine qaraǵanda, balalar quqyǵyn qorǵaý boıynsha keıbir zańnamalyq aktilerge tolyqtyrýlar men ózgerister engizý týraly zań jobasynyń jumys toby ótken jyly mamyr aıynda qurylǵan.
Al májilis saılaýynan keıin jumys toby qaıtadan jasaqtaldy. Oǵan 65 adam – depýtattar, psıhologtar, pedagogtar, qoǵam belsendileri, sarapshylar men quqyqtanýshylar kiredi.
"Qańtar aıynan beri úsh otyrys ótti. Jumys tobynyń árbir otyrysy parlament májilisiniń resmı saıtynda ashyq kórsetiledi. Ony árbir azamat kóre alady. Qazirgi ýaqytta úsh kodekske jáne alty zańǵa 35-ten astam túzetý engizý usynyldy. Al "jábirleý" túsinigin jumys toby tek uǵym retinde engizýdi qarastyryp otyr, ıaǵnı, tek aldyn alý sharalaryn uıymdastyrý, balalar arasynda profılaktıkalyq jumystardy júrgizý úshin qajet", - dep atap ótti Beısenbaev.
Sondaı-aq, zań aıasynda aldyn alý sharalaryn bir júıege keltirý josparlanǵan. Sebebi jábirleýdiń arty kıberbýllıngke ulasyp jatady. Balanyń jeke basyna qatysty máseleler áleýmettik jelige de salynady.
"Sosyn bul túsinik boıynsha eshqandaı ákimishilik nemese qylmystyq is-áreketterdi engizý jospary joq, ıaǵnı, túsindirme jumystary júrgiziledi. Kinálilerdi anyqtaý qarastyrylmaǵan. Osyny birden aıtyp qoıaıyq", - dedi Beısenbaev.
Búginde "jábirleý" uǵymyn engizý boıynsha arnaıy talqylaý alańy da qurylǵan. Negizgi maqsat – túsinikti ári jan-jaqty aqparat berý.
