Jazýshy, Memlekettik syılyqtyń ıegeri Ánes Saraı dúnıeden ótti. Qaraly habardy alǵashqylardyń biri bolyp QR Aqparat jáne qoǵamdyq damý mınıstri Aıda Balaeva jetkizdi.
«Búgin halqymyzǵa tanymal daryndy jazýshy, zııaly azamat, belgili qoǵam qaıratkeri Ánes Saraı aǵamyz ómirden ozdy. Ókinishke qaraı, ýaqyt alǵa jyljyǵan saıyn aldyńǵy býyn aǵa-apalarymyz máńgilik saparǵa attanyp jatyr. Ómir bar jerde – ólim bar desek te, bul – bir áýlettiń ǵana emes, ádebıet súıer qaýymy bar búkil qoǵam úshin orny tolmas aýyr qaıǵy bolyp otyr. Rýhanııat salasyna qatysty talaı iste aǵamyzdyń aldyn kórip, aǵalyq aqylyn tyńdap, jaqyn syılastyqta aralasqan edik.
Aǵamyzdyń jarqyn beınesi men ádebıet álemindegi shyǵarmalary qalyń oqyrman qaýymnyń rýhanı oljasyna aınalyp, halyq jadynda máńgi saqtalady.
Aǵamyzdyń qazasyna baılanysty – Altynshash Jaǵanova apamyzǵa jáne barlyq aǵaıyn-týys, jaqyndarynyń qaıǵylaryna ortaqtasyp, kóńil aıtamyn»,-dedi ol Facebook jelisindegi resmı paraqshasynda.
Ánes Tólendiuly - jazýshy, dramatýrg, Qazaqstannyń eńbek sińirgen qaıratkeri. 1937 jyly Reseıdiń Astrahan oblysy, Volodarskıı aýdany, Kirmalaı aýylynda týǵan. «Egemen Qazaqstan», «Jas Alash» gazetterinde ádebı qyzmetker, bólim meńgerýshisi, «Jazýshy» baspasynda redaktor, Qazaqstan jazýshylar odaǵynda ádebı keńesshi bolyp qyzmet atqarǵan. Ol Batys Alashorda tarıhyn qamtıtyn «Edil-Jaıyq» romanynyń jáne Alash kozǵalysyna qatysty derekti materıaldardyń avtory.
«Adyrna» ulttyq portaly
