A.Aımaǵambetov: 15 aımaqtyq joǵary oqý orny damytylady

2287
Adyrna.kz Telegram

Qazaqstanda 15 aımaqtyq joǵary oqý orny damytylady, dep habarlaıdy «Adyrna» tilshisi BǴM baspasóz qyzmetine silteme jasap.

Olar naqty krıterııler boıynsha iriktep alynady. Atalǵan joǵary oqý oryndary daryndy jastardy jınaıtyn óńirlik ortalyqtarǵa aınalmaq.

«Naqty krıterııler boıynsha 15 óńirlik joǵary oqý ornyn iriktep alamyz. Osy ýnıversıtetter arqyly óńirlerdegi bilim sapasyn arttyrý úshin nysanaly qarjy bólip, olardy jańa zerthanalarmen qamtamasyz etemiz. Ol oqý ornyndarynda jańa bilim baǵdarlamalary da ashylady. Sonymen qatar sapasyz joǵary oqý oryndaryn jabý boıynsha jumystar da jalǵasyn tabady», – dep atap ótti A.Aımaǵambetov.

Memleket basshysynyń tapsyrmasy boıynsha joǵary bilim berý júıesinde akademııalyq adaldyqty buzǵany jáne sybaılas jemqorlyq is-áreketteri úshin joǵary oqý oryndarynyń jaýapkershiligi kúsheıtildi. Joǵary oqý oryndarynyń akademııalyq derbestigin keńeıtý boıynsha aýqymdy jumys júrgizilgen bolatyn. Endi akademııalyq jáne basqarýshylyq erkindik qazaqstandyq kolledjderge de beriledi.

«Kolledjderge akademııalyq derbestik beriledi. Atalǵan shara bilim berý baǵdarlamalarynyń mazmunyn ózgertýge, bilim sapasyn arttyrýǵa, oqý merzimin qysqartýǵa múmkindik beredi. Sol arqyly túlekter tezirek jumysqa ornalasa alady», – dedi Bilim jáne ǵylym mınıstri.

Kolledjderge akademııalyq erkindik berý – kadrlardy daıarlaýda ıkemdilikti qamtamasyz etip, oqý oryndarynyń jumys berýshilermen birlese otyryp, bilim berý baǵdarlamalarynyń mazmunyn, oqytý merzimderi men traektorııasyn aıqyndaýǵa múmkindik beredi.

«Adyrna» ulttyq portaly

Pikirler