Shymkent qalasynda erekshe balalardyń ata-analary óz kúshterimen ońaltý ortalyǵyn ashqan. Bul týraly qala ákiminiń birinshi orynbasary Shyńǵys Muqan Facebook jelisinde jazdy, dep habarlaıdy «Adyrna» tilshisi.
«Instagram paraqshama ótinish kelip tústi. Onlaın qabyldadym. Ózderi ashqan Ońaltý ortalyǵyna shaqyrdy. Bardym, kórdim, tánti boldym. Erekshe balalardyń analary eken. Ózderi birigip, bir úıdi jalǵa alyp, óz balalaryna, bir jaǵynan, balabaqsha, ekinshi jaǵynan, reabılıtaııa uıymdastyryp otyr. Jandarym sol, sonsha beınet bergen. Amal neshik! Barǵa shúkirshilik aıtasyń»,-dedi ol.
Shyńǵys Muqan analardyń bul áreketin naǵyz kóshbasshylyqtyń úlgisine teńedi.
«Basyńa túspese bilmeısiń. Erekshe balanyń ata-anasy bolýdy bir adamdaı biletin adam retinde aıtarym: Jasymańdar, ata-analar. Alla taǵala synaqty kótere alatyn adamdarǵa ǵana beredi. Taǵdyrdy qabyldap, balalardy baqytty etý úshin aıanbańyzdar. Barlyq nárseniń qaıyry bar.
Erekshe balalardyń ata-analarynyń bul áreketi – naǵyz kóshbasshylyqtyń úlgisi. Muny men «qarsylyqsyz ózgeris» dep atar edim.Adam qıyndyqqa tap bolǵanda ishte qarsylyq paıda bolady. Qarsylyq ádette ózińe emes, ózgege baǵyttalady. Qaraspady dep memorgandardy aıyptaısyń. Aǵaıyn-týma syrt aınalyp ketkendeı kórinedi. Taǵdyryńa nalısyń. Osyndaıda qarsylyqty syrtqa emes, ishke baǵyttap, qıyndyqty múmkindikke aınaldyrýǵa, suraqty ózgege emes, eń aldymen ózińe qoıa bilý – bul kóshbasshylyq. Nege «qarsylyqsyz ózgeris»? Men kezdesken ata-analar «balamyzǵa jaǵdaı jasamaı jatyr, ońaltý joq» dep synap, memlekettik saıasatqa qarsylyq tanytýǵa da bolady. Oǵan jáne quqyqtary da bar. Biraq synap-minemeı, qarsylyq tanytatyn obekt izdemeı, sol ózgeriske ózderi kóshbasshy bolý, shynynda da, úlgi bolarlyq. Kóshbasshylyq tanytyp júrgen ata-analarǵa memleket tarapynan zań aıasynda qandaı qoldaý kóre alatynyn túsindirdik. Bir sózben, jaraısyzdar!»-dep sózin qorytyndylady ákim orynbasary.
«Adyrna» ulttyq portaly
