San saýal týdyrǵan Zań jobasy daýǵa aınaldy. Byltyrǵy Májilis, birinshi oqylymda maquldap jibergen «Otbasylyq zorlyq-zombylyq» týraly zańnama qoǵam arasynda shý shyǵardy. Ózgerister, kóptiń kóńilinde kúdik týdyrdy. Narazylyq tanytyp, depýtattardy synaıtyndar kóbeıdi. Jańa Zań jobasynda aqylǵa qonymsyz baptar kezdesetinin depýtattar moıyndady. «Zań áli de qaralady», dep sendirdi. Bul týraly Newsroom+aqparat agenttigi Astana kanalyna silteme jasap habarlaıdy.
Jańadan saılanǵan depýtattar jumysyna kirispeı jatyp bastary daýǵa qaldy. Byltyr, birinshi oqylymda maquldanyp ketken zań Májilisti jerge qaratty. «Bul aldyńǵylardyń qateligi», dep aqtaldy sý jańa depýtattar. Qalaı bolǵanymen kópshilik bul zańdy aıamaı synady.
«Jyldar boıy qalyptasqan qazaqı qundylyq dalada qaldy», deıdi belsendiler. Eldiń qytyǵyna tıgen tustyń biri – kıeli «ata-ana» sóziniń «asyraýshyǵa» aınalýy. Taǵy bir túsiniksizi balanyń áke-sheshesine shaǵymdana alýy. Es bilmegen balanyń sózi ata-ana sózinen salmaqty bolyp shyǵa keldi.
Al depýtattardyń aıtýynsha, zań jobasy anaý aıtqandaı nashar emes. «Otqa maı quıyp», júrgender kóp kórinedi. Degenmen, zańnamany úńilip oqymaǵandaryn depýtattar moıyndap otyr.
Bekbolat TILEÝHAN, QR Parlamenti Májilisiniń Depýtaty: "Bul máselege úńile almaı qalyp, birinshi oqylymda maquldap jiberippiz. Qarsymyn, qazir qarsy bolyp turmyn.
Daýly Zańdy jańa depýtattar «jarylqaımyz», dep otyr. Jýyrda tipti arnaıy jumys toby da qurylatyn kórinedi.
Májilis depýtaty Elnur Beısenbaev, «Zań jobasyndaǵy túıtkilder túbegeıli ózgeredi», deıdi.
