Maks Boqaev 2021 jyldyń 4 aqpanynda bostandyqqa shyǵady. Azamattyq belsendi jazasyn ótep jatqan túzetý kolonııasynyń basshylyǵy “Ýralskaıa nedelıa” basylymynyń saýalyna sóı dep jaýap bergen.
“Bostandyqqa shyǵatyn merzimimdi aıtty. 4 aqpanǵa belgilegen eken. Ázir bul sóz júzindegi áńgime. Resmı túrde rastaýdy talap ettim. 19 qańtarda sot ótedi, sol kezde erkindik alǵannan keıingi meni baqylaýdyń talap-sharty bekitilýi qajet. Eki jyl buryn Qylmystyq kodekske lańkestik baby boıynsha sottalǵandardy baqylaý týraly ózgeris engen. Týra jolǵa tústi me, joq pa soǵan kóńil bóledi. Olarǵa ózimniń “túzelmesimdi” áýelden eskertkenmin”, – deıdi Maks Boqaev.
Aıtýynsha jeltoqsan aıynda kolonııa basshylyǵy oǵan qysym kórsetpek bolǵan.
“15 jeltoqsanda jýrnalıstpen júzdespek edim. Alaıda sońǵy sátte bul kezdesýge tyıym saldy. 16 jeltoqsanda týys-týǵanmen telefon arqyly tildespek edim. Maǵan tıesili 15 mınýtty kesip tastady. El-jurtty alańǵa shyǵýǵa úgitteıdi dep úreılense kerek”, – deıdi Boqaev.
Aıta keteıik, Maks Boqaev pen Talǵat Aıan 2016 jyly sheteldikterge jer satýǵa qarsy shyqqan Atyraýdaǵy mıtıngiden keıin qamaýǵa alynyp, 5 jylǵa sottalǵan. Mıtıngige arnaıy kelgen aımaq basshysy Nurlan Noǵaev narazylyqqa jetekshilik etkender jaýapqa tartylmaıtynyn aıtqan-tyn. Soǵan qaramaı Maks Boqaev pen Talǵat Aıan qamaýǵa alynǵan. Halyqaralyq adam quqyǵyn qorǵaý uıymdary bul isti saıası qýdalaý dep sanaıdy.
Bılik Boqaevty kinásin moıyndaǵan jaǵdaıda merziminen buryn bosatýǵa ázir ekenin birneshe ret málimdegen. Azamattyq belsendi ózin kináli sanamaıtynyn jáne eshqashan mundaı qadamǵa barmasyn aıtqan.
